تاۋدا جوعالعان 7 جاسار بالا قىرعىزستان شەكاراسىنان ىزدەستىرىلۋدە

«ازىرگە ناتيجە جوق. بۇگىن قۇتقارۋشىلار ەكى باعىتقا ءبولىندى . بالانى ىزدەۋ ايماعى 25 شاقىرىمعا كەڭەيەدى. قۇتقارۋشى توپتىڭ بىرەۋى باتىسقا قاراي، ەكىنشىسى شىعىس جاق اۋماقتى ىزدەيدى. سونداي-اق، ىزدەۋ شارالارىنا وبلىس اكىمدىگىنىڭ وكىلدەرى مەن 2 دەپۋتات قوسىلدى. 15 ادام اتقا قونىپ، 40 پوليتسەي، اكىمدىكتىڭ 6 قىزمەتكەرى بەلگىلەنگەن ايماقتى سىزبا بويىنشا ىزدەۋ جۇمىستارىن جۇرگىزەدى. ءيىسشىل يتتەردى جەتەكتەگەن توپ جىرا ، شاتقالداردى ارالاۋدا. قۇتقارۋشى توپتىڭ ءبىر بولىگى قىرعىزستان شەكاراسىنا دەيىن سوزىلعان اۋماقتى تەكسەرۋگە شىقتى»، - دەدى الماتى وبلىسى ءى ءى د باسپا ءسوز قىزمەتىنىڭ باسشىسى سەرگەي نەزنايەۆ.

ەسكە سالا كەتسەك، الماتى وبلىسىنىڭ جامبىل اۋدانىندا جوعالىپ كەتكەن بالانى قۇتقارۋشىلار 14- شىلدەدەن بەرى ىزدەستىرۋدە.

2011-جىلى تۋعان ەرنۇر ءسادۋاقاس ىنتىماق اۋىلىنان وڭتۇستىك قاپتالداعى «كىشى ساز» جايىلىمىنا بارا جاتقان جولدا تاۋلى اۋماقتا جوعالعان.

7 جاستاعى ەرنۇرمەن بىرگە ۇلكەندى-كىشىلى 5 بالا جولعا شىققان. قازىر بالالاردىڭ بارلىعى اۋىلدا. تەك ەرنۇر عانا ورالمادى.