قازاقستاندا اۋىل شارۋاشىلىعى تەحنيكاسىنىڭ 76 پايىزى توزعان
بۇل تۋرالى اۋىل شارۋاشىلىعى مينيسترلىگى باسپا ءسوز قىزمەتىنەن مالىمدەدى، دەپ حابارلايدى قازاقپارات ءتىلشىسى.
«رەسپۋبليكادا 147 مىڭ تراكتور، 38 مىڭ كومباين، 4,7 مىڭ ەگىس كەشەنى، 77 مىڭ ءدان سەپكىش، 13 مىڭ دەستەلەگىش، 73 مىڭ تراكتور تىركەمەسى، 5,8 مىڭ بۇرىككىش، 221 مىڭ توپىراق وڭدەۋ جابدىعى بار. وزدىگىنەن جۇرەتىن تەحنيكانىڭ بۇكىل پاركىنىڭ ورتاشا توزۋى 76 پايىزدى قۇرادى»، - دەلىنگەن مينيسترلىكتىڭ قازاقپارات اگەنتتىگىنە بەرگەن جاۋابىندا.
اگروونەركاسىپتىك كەشەندى تەحنيكالىق قايتا جاراقتاندىرۋ ماسەلەسىن شەشۋ جانە اۋىل شارۋاشىلىعى تەحنيكاسىن ساتىپ الۋدى جەڭىلدەتۋ ءۇشىن ءتيىستى مەملەكەتتىك قولداۋ باعدارلامالارى ەسكەرىلگەن.
«بىرىنشىدەن، ينۆەستيتسيالىق شىعىنداردى سۋبسيديالاۋعا توقتالساق، اۋىل شارۋاشىلىعى تەحنيكاسىن ساتىپ العان كەزدەگى قۇنىنىڭ 25-30 پايىزى مەملەكەت بيۋجەتىنەن وتەلەدى. بۇدان باسقا، وبلىستاردىڭ اۋماقتارىن دامىتۋ باعدارلامالارىندا كوزدەلگەن اۋىل شارۋاشىلىعى تەحنيكاسىنىڭ، ماشينالار مەن جابدىقتاردىڭ باسىم تۇرلەرى بويىنشا ءوڭىر اكىمدىكتەرىنىڭ جەرگىلىكتى بيۋجەت قاراجاتى ەسەبىنەن سۋبسيديالاۋ نورماتيۆتەرىن %50 ۇلعايتۋعا قۇقىعى بار»، - دەپ اتالىپ وتكەن ۆەدومستۆو مالىمەتىندە.
ەكىنشىدەن، اۋىل شارۋاشىلىعى تەحنيكاسىن ساتىپ الۋ ءۇشىن كرەديت/ليزينگ بويىنشا سىياقى ستاۆكاسىن سۋبسيديالاۋ (%10) قاراستىرىلعان. ساتىپ الىناتىن اۋىل شارۋاشىلىعى تەحنيكاسىنىڭ نەگىزگى كولەمى ليزينگ ارقىلى كەلەتىنىن ەسكەرە وتىرىپ، كرەديت/ليزينگ بويىنشا سىياقى ستاۆكاسىن %10 مولشەرىندە سۋبسيديالاعاندا، ا ش ت ءو ءۇشىن تۇپكىلىكتى مولشەرلەمەنى %7 عا دەيىن تومەندەتۋگە مۇمكىندىك بەرەدى («قازاگروقارجى» ا ق قولدانىستاعى سىياقى ستاۆكاسى %17 بولعان كەزدە).
بۇل ءوز كەزەگىندە ا ش ت ءو ءۇشىن قارجىلىق جۇكتەمەنى تومەندەتەدى.
«ۇشىنشىدەن، «بايتەرەك» حولدينگىنىڭ قارجى ينستيتۋتتارى (قازاگروقارجى، ونەركاسىپتى دامىتۋ قورى) ارقىلى ەلىمىزدە وندىرىلگەن اۋىل شارۋاشىلىعى تەحنيكاسىنا جەڭىلدەتىلگەن كرەديت بەرۋ (جىلىنا %6-7) باعدارلاماسى قامتىلىپ وتىر.
«اتالعان مەملەكەتتىك قولداۋ باعدارلامالارىن جۇزەگە اسىرۋ ءوز ناتيجەسىن بەرىپ كەلەدى. سوڭعى 5 جىلدا اۋىل شارۋاشىلىعى تەحنيكاسى پاركىنىڭ جاڭارۋ دەڭگەيى وڭ ديناميكانى كورسەتىپ وتىر.
ەگەر 2017-جىلى جاڭارتۋ كورسەتكىشى %1,9 بولسا، 2021-جىلعا قاراي ول %4,3 بولدى (2 ەسە ءوستى).
«قازاگروقارجى» ا ق باس ليزينگتىك كومپانياسىنىڭ مالىمەتىنە قاراعاندا، 2017-جىلى 2376 اۋىل شارۋاشىلىعى تەحنيكاسى ساتىپ الىنسا، 2021-جىلى 7248 (3 ەسە ءوستى) تەحنيكا قامتىلدى»، - دەلىنگەن مينيسترلىك اقپاراتىندا.
بۇدان بۇرىن حابارلانعانداي، قازىرگى جاعدايدى ەسكەرە وتىرىپ، ورتا ەسەپپەن العاندا تەحنيكانىڭ جاڭارۋ دەڭگەيى 8-10 پايىزدان كەم بولماۋى كەرەك.
