75 مىڭنان اسا قازاقستاندىق ءبىرجولعى زەينەتاقى تولەمىن الدى
بۇل تۋرالى قازاقپارات ب ج ز ق سىلتەمە جاساپ حابارلايدى.
2021-جىلدىڭ 12- اقپانىنداعى جاعداي بويىنشا ب ج ز ق- عا ۋاكىلەتتى وپەراتورلاردان («وتباسى بانكى» ت ق ج ب» ا ق جانە «قازاقستان حالىق بانكى» ا ق) تۇرعىن ءۇي جاعدايلارىن جاقسارتۋ ماقساتىندا ءبىرجولعى زەينەتاقى تولەمدەرىن جۇزەگە اسىرۋعا 115608 ءوتىنىش ءتۇستى.
جالپى سوماسى 408,1 ميلليارد تەڭگەدەن اساتىن 75186 ءوتىنىش ورىندالدى. سالىمشىلاردىڭ ارنايى شوتتارىنا تۇسكەن تولەمدەردىڭ ورتاشا سوماسى 5,4 ميلليون تەڭگەدەن اساتىن سومانى قۇرادى.
15,5 ميلليارد تەڭگە سوماعا 2888 ءوتىنىش ۋاكىلەتتى وپەراتورلاردا اشىلعان ارنايى شوتتارعا كەيىننەن تولەمدەر جاساۋ ءۇشىن وڭدەلۋدە.
25- قاڭتاردان باستاپ (ب ج ز ق ۋاكىلەتتى وپەراتوردان ءوتىنىش قابىلداي باستاعان كۇن) 37534 ءوتىنىش زاڭناما تالاپتارىنا سايكەس كەلمەۋىنە بايلانىستى قابىلدانبادى. وتىنىمدەردى قابىلداماۋدىڭ نەگىزگى سەبەبى وتىنىشتە كورسەتىلگەن سۇراتىلىپ وتىرعان سومانىڭ زەينەتاقى جيناقتارىنىڭ الۋعا قولجەتىمدى سومادان اسىپ كەتۋى بولىپ تابىلادى.
وتىنىشتەردى قابىلداماۋ سەبەپتەرى مەن ولاردى جويۋ بويىنشا ۇسىنىمدار تۋرالى بۇعان دەيىن حابارلادى.
ەسكە سالساق، 2021-جىلى 2- قاڭتاردا ق ر پرەزيدەنتى قاسىم-جومارت توقايەۆ زەينەتاقى جيناعىنىڭ ءبىر بولىگىن ماقساتتى پايدالانۋعا قاتىستى زاڭعا قول قويدى. قازاقستاندىقتاردىڭ زەينەتاقى جيناقتارىن پايدالانۋ ءۇشىن جاڭارتىلعان «جەتكىلىكتىلىك شەگى» جاريالاندى.
زەينەتاقى جيناعىنان الۋعا بولاتىن سوما ب ج ز ق سايتىندا اۆتوماتتى تۇردە كورسەتىلەدى.
23- قاڭتاردان قازاقستاندا زەينەتاقىنىڭ ءبىر بولىگىن الۋعا ءوتىنىم قابىلداۋ باستالدى. ارنايى پورتالدا زەينەتاقىنىڭ ءبىر بولىگىن الۋعا ءوتىنىم قابىلداۋ باستالعالى ءۇش ساعاتتىڭ ىشىندە 4 مىڭنان استام ادام ءوتىنىش بەردى.