كاسپي قۇبىر كونسورسيۋمى ارقىلى 745 ميلليون توننادان استام مۇناي تاسىمالداندى
بۇل تۋرالى XVII قازاقستان مەن رەسەي ءوڭىرارالىق ىنتىماقتاستىق فورۋمىندا ق ر پرەزيدەنتى قاسىم- جومارت توقايەۆ ايتتى، دەپ حابارلايدى قازاقپارات ءتىلشىسى.
ەنەرگەتيكا سالاسىنداعى ەكىجاقتى ءوزارا ءىس- قيمىلدىڭ قازىرگى دەڭگەيىنىڭ ارتىپ كەلە جاتقانىنا جەكە توقتالعىم كەلەدى. بيىل مۇناي تاسىمالداۋ جونىندەگى ءىرى حالىقارالىق جوبا - كاسپي قۇبىر كونسورتسيۋمىنىڭ 25 جىلدىعىن اتاپ وتەتىن بولامىز. كاسپي قۇبىر كونسورتسيۋمى قۇرىلعاننان ساتتەن بەرى الەمدىك نارىققا 745 ميلليون توننادان استام مۇناي جەتكىزىلدى»، - دەدى مەملەكەت باسشىسى.
ق ر پرەزيدەنتىنىڭ اتاپ وتۋىنشە، مۇناي ءوندىرۋ كولەمىنىڭ ارتۋىنا، جاڭا كەن ورىندارىنىڭ يگەرىلۋىنە، سونىمەن قاتار مۇنداي ءوندىرۋ جونىندەگى بىرلەسكەن جوبالاردىڭ قولعا الۋىنا بايلانىستى كاسپي قۇبىر كونسورتسيۋمىنىڭ وتكىزۋ قابىلەتىن ارتتىرىپ، ونى باسقارۋدا تۇراقتىلىقتى قامتاماسىز ەتۋ ماڭىزدى. «ءبىزدىڭ كاسىپورىندارىمىز بىرلەسىپ، الەمدىك دەڭگەيدەگى كەن ورىندارىن - تەڭىز بەن قاراشىعاناقتى يگەرىپ جاتىر. كاسپيدىڭ قازاقستاندىق بولىگىندە «جەڭىس» جانە «ءال- فارابي» تەڭىز جوبالارى جۇزەگە اسىرىلىپ جاتىر. بۇل جوبالاردىڭ جالپى قۇنى 6,5 ميلليارد دوللاردى قۇرايدى. بۇعان قوسا، حازار تەڭىزىنەن ءىرى «قالامقاس» كەن ورنىنان يگەرۋگە كىرىسەمىز. رەسەيلىك تاراپتان ستراتەگيالىق سەرىكتەستىك ايقىندالعان. بۇل «لۋكويل» كومپانياسى. جوبانىڭ جالپى قۇنى شامامەن 5 ميلليارد دوللاردى قۇرايدى»، - دەدى قاسىم- جومارت توقايەۆ.
قاسىم- جومارت توقايەۆ «قازترانسگاز» كومپانياسى رەسەيلىك «گازپروم» ۇلگىسىمەن دامىتۋ مۇمكىندىگى تۋرالى پىكىر ءبىلدىردى.
«گازدى تازا وتىن رەتىندە پايدالانۋ ەرەكشە نازار اۋدارۋعا تۇرادى. گاز سالاسىنىڭ ينۆەستيتسيالىق تارتىمدىلىعىن ارتتىرۋ ءۇشىن ءبىزدىڭ ەلىمىزدە ءبىرقاتار جۇيەلى شارالار قابىلدانۋدا، گازعا باعا بەلگىلەۋدىڭ جاڭا نارىقتىق تاسىلدەرى ايقىندالدى. بۇل گاز جوبالارىنا سالىمداردى تيىمدىرەك ەتەدى»، - دەدى قاسىم- جومارت توقايەۆ قازاقستان مەن رەسەيدىڭ XVII ايماقارالىق ىنتىماقتاستىق فورۋمىندا. «ءبىز «قازترانسگازدى» رەسەيلىك «گازپروم» سياقتى ترانسفورماتسيالاۋ تۋرالى شەشىم قابىلدادىق. كومپانيا تولىققاندى ۆەرتيكالدى ينتەگراتسيالانعان ۇلتتىق گاز كومپانياسى بولادى. گازدىڭ رەسۋرستىق بازاسىن ۇلعايتۋ ءۇشىن رەسەيمەن بىرلەسكەن ءىرى جوبالاردى - حۆالىنسكايا جانە يماشينسكايا جوبالارىن ۋاقتىلى جۇزەگە اسىرۋدىڭ ماڭىزى زور. «گازپروممەن» كوممەرتسيالىق ماسەلەلەردى تەز ارادا شەشۋگە كەلۋدىڭ ماڭىزى زور، بۇل اتالعان جوبالاردى ىسكە اسىرۋدى جەدەلدەتەدى»، - دەدى مەملەكەت باسشىسى.
«بالامالى ەنەرگيا ءوندىرىسىنىڭ تاعى ءبىر پەرسپەكتيۆالى باعىتى اتوم جانە سۋتەگى ەنەرگەتيكاسى بولىپ تابىلادى. ۇكىمەت قازاقستاندا قاۋىپسىز اتوم ەنەرگەتيكاسىن دامىتۋ جانە ەنەرگەتيكانىڭ مۇلدەم جاڭا ءتۇرى - سۋتەكتى ەنەرگەتيكانى ىسكە قوسۋ مۇمكىندىكتەرىن زەردەلەۋدە»، - دەپ تۇيىندەدى پرەزيدەنت.
ايتا كەتەيىك، پرەزيدەنت قاسىم- جومارت توقايەۆ شاراعا ونلاين فورماتتا قاتىستى.
اۆتور: مارلان جيەمباي
