اعىمداعى جىلى «نۇر وتان» پارتياسىنىڭ قوعامدىق قابىلداۋ بولمەلەرىنە ازاماتتاردان 73 مىڭنان استام ءوتىنىش ءتۇستى
بۇل تۋرالى بۇگىن اتالعان پارتيانىڭ رەسپۋبليكالىق قوعامدىق قابىلداۋ ءبولىمىنىڭ مەڭگەرۋشىسى ابىلايحان وسپانوۆ ءمالىم ەتتى.
«اعىمداعى جىلدىڭ 10 ايىندا عانا قوعامدىق قابىلداۋعا ازاماتتاردان 73 مىڭنان استام ءوتىنىش كەلىپ ءتۇستى. ونىڭ ىشىندە وتىنشتەردىڭ 20 پايىزى وڭ شەشىمىن تاپسا، قالعاندارىنا سايكەسىنشە ءتۇسىندىرۋ جۇمىستارى جۇرگىزىلدى. ساراپتاما كورسەتكەندەي، وتىنىشتەردىڭ باسىم بولىگىن الەۋمەتتىك ماسەلەلەر قۇرايدى. ونىڭ ىشىندە تۇرعىن ءۇي مەن جەر ۋچاسكەلەرىن ءبولۋ، جۇمىسقا ورنالاسۋ جانە جالاقى تولەمەۋ ماسەلەلەرى، نەسيە مەن شاعىن بيزنەس پروبلەمالار جاننە قۇقىق قورعاۋ ورگاندارىنا شاعىمدار بار»، - دەدى ول.
وسى رەتتە ول قوعامدىق قابىلداۋلار جالپى قوعامنىڭ كوڭىل كۇيىن باقىلاپ، ماسەلەلەرگە جەدەل نازار اۋدارۋعا مۇمكىندىك بەرەتىن حالىقپەن بايلانىستىڭ ءتيىمدى ارناسى بولىپ تابىلاتىندىعىن اتاپ ءوتتى. ول ءۇشىن بارلىق اۋداندار مەن قالالاردا پارتيانىڭ 241 قوعامدىق قابىلداۋ بولمەلەرى حالىققا قىزمەت كورسەتۋدە.
«قوعامدىق قابىلداۋ جۇمىسىنىڭ تيىمدىلىگىن ارتتىرۋ ءۇشىن ازاماتتاردى قابىلداۋدىڭ جاڭا ادىستەرى ەنگىزىلدى. شالعايداعى اۋىلدىق مەكەندەردىڭ تۇرعىندارىنىڭ ۋاقىتى مەن قارجىسىن ۇنەمدەۋ ءۇشىن «قازپوشتا» بولىمشەلەرى ارقىلى «Skype» باعدارلاماسىنىڭ كومەگىمەن وبلىستىق باسشىلاردىڭ ازاماتتاردى قابىلداۋ جۇمىسى جۇيەگە كەلتىرىلدى. ماسەلەن، جىل باسىنان بەرى 50 ەلدى مەكەن ءۇشىن وبلىستىق باسشىلاردىڭ ازاماتتاردى ونلاين رەجىمدى قابىلداۋى جۇرگىزىلدى»، - دەدى ا. وسپانوۆ.
