جالعان «7-20-25» باعدارلامالار كوبەيىپ بارادى

استانا. قازاقپارات - سوڭعى كەزدە «7-20-25» باعدارلاماسىنا ۇقساس اتتى جامىلىپ، جارناماسىن جاساپ جاتقان ءتۇرلى باعدارلامالار كوبەيۋدە.

 بۇل تۋرالى  «ەگەمەن قازاقستان» گازەتىنە «باسپانا» يپوتەكالىق ۇيىمىنىڭ سىرتقى كوممۋنيكاتسيالار قىزمەتىنىڭ وكىلدەرى حابارلاپ، حالىقتى اباي بولۋعا شاقىرعان.

باسىلىمنىڭ جازۋىنشا، مۇنداي جارنامالاردى تاراتىپ وتىرعان قۇرىلىس كومپانيالارى مەن تۇرعىن ءۇي كووپەراتيۆتەرى عالامتور مەن الەۋمەتتىك جەلىلەردە «0-20-25»، «5-19-25»، «5-10-25» سىندى ءتۇرلى اكسيالار ۇيىمداستىرىپ جاتىر. الايدا ولاردىڭ باسپانالى بولۋدى ارمانداعان حالىققا ۇسىنىپ وتىرعان تالاپتارى مۇلدە باسقاشا.

 «مىسالى، اتاۋى ايقايلاپ تۇرعانىمەن، نەسيەنى 25 جىلعا ەمەس، 25 ايعا عانا بەرۋى مۇمكىن. نەمەسە «20» سانى العاشقى جارنا ەمەس، نەسيە بويىنشا ۇستەمە مولشەرلەمە بولۋى ابدەن ىقتيمال. مۇنداي ساندا بار دا، ساناتتا جوق اكسيالاردىڭ اتى جەر جارىپ تۇرعانىمەن، ەرتەڭ تالايدى سازعا وتىرعىزىپ كەتۋى بەك مۇمكىن. وعان نەگىز دە جوق ەمەس. ويتكەنى بۇعان دەيىن دە تۇرعىندار مەن قۇرىلىس كومپانيالارى جانە تۇرعىن ءۇي كووپەراتيۆتەرى اراسىندا تۇسىنبەستىك ورىن الىپ، سوڭىندا اتالعان مەكەمەلەر جاۋاپكەرشىلىكتەن جالتارىپ، قاراپايىم حالىق جيعان- تەرگەنىنەن قاعىلعان وقيعالار كەزدەسكەن- ءدى» دەپ جازادى باسىلىم.

 وسىعان بايلانىستى «باسپانا» يپوتەكالىق ۇيىمى كەيىن كەلەڭسىزدىكتەر تۋىنداماۋى ءۇشىن حالىقتى مۇنداي اكسيالار مەن جارناماعا ساقتىقپەن قاراۋعا شاقىرادى. بىردەن ايتۋ كەرەك، اتالعان اكتسيالاردا كورسەتىلگەن شارتتار «7-20-25» باعدارلاماسىنىڭ شارتتارىنان مۇلدە بولەك. بۇل باعدارلامادا ءۇي باعاسى مەن نەسيە مەرزىمىنە سايكەس، اي سايىنعى تولەمدەردىڭ كەستەسى ازىرلەنگەن. «باسپانا» كومپانياسىنىڭ وكىلدەرى كەز كەلگەن جاعدايدا ارتىق تولەمدەرگە ۇرىنباۋ ءۇشىن كەستەنى پايدالانۋعا كەڭەس بەرەدى. بۇعان قوسا، يپوتەكالىق نەسيەنى تەك قانا باعدارلامانىڭ ەكىنشى دەڭگەيلى سەرىكتەس- بانكتەرى بەرە الادى. ال قۇرىلىس كومپانياسى نەمەسە تۇرعىن ءۇي كووپەراتيۆتەرى ەش ۋاقىتتا «7 - 20 - 25» باعدارلاماسىمەن نەسيە بەرە المايدى.

«بۇگىنگى تاڭدا «7-20-25» باعدارلاماسىنىڭ شارتتارى نارىقتاعى ەڭ ءتيىمدى ۇسىنىس بولىپ وتىر. تيىسىنشە، وسى نارىقتاعى ءتۇرلى كومپانيالاردىڭ «7-20 -25» باعدارلاماسىنىڭ اتىن جامىلىپ، ءوز ونىمدەرىن وتكىزۋگە ۇمتىلاتىندارى دا بايقالادى. ءبىز نارىقتىڭ دامۋىن قولدايمىز، الايدا حالىقتى الداۋعا تۇبەگەيلى قارسىمىز»، - دەيدى «باسپانا» يپوتەكالىق ۇيىمىنىڭ باسشىسى قايرات التىنبەكوۆ.

جالپى، بۇگىنگى تاڭدا حالىقتىڭ باسپانا الۋعا دەگەن قۇلشىنىسى وتە جوعارى. ستاتيستيكا كوميتەتىنىڭ دەرەگىنە سۇيەنسەك، شىلدە ايىندا تۇرعىن ۇيلەردىڭ باعاسى 0,1 پروتسەنتكە تومەندەسە، جالعا بەرۋ قۇنى 0,5 پروتسەنتكە قىمباتتاعانى انىقتالىپ وتىر.

اۆتور: قانات مامەتقازى ۇلى