باعدارلاما «7-20-25» اياسىندا پاتەر الۋشىلاردىڭ وتباسىلىق تابىسى قانشا
تۇرعىن ءۇي نارىعىنا جۇرگىزىلگەن ساراپتاماعا سايكەس، اۋدانى 62 شارشى مەتردى قۇرايتىن پاتەرلەر نەگىزىنەن 2 بولمەلى بولىپ كەلەدى. سونىمەن قاتار، «باسپانا» يپوتەكالىق ۇيىمىنىڭ ماماندارى «7-20-25» باعدارلاماسى بويىنشا كليەنتتەر ساتىپ الاتىن باسپانانىڭ ورتاشا قۇنىن دا ەسەپتەپ شىعارعان. باسپانانىڭ ورتاشا قۇنى 14 ميلليون 68 مىڭ تەڭگەنى قۇرايدى. زايەمشى دا انىقتالىپ، ونىڭ جالپى بەينەسى دە ايقىندالعان. ولار - وتباسىلىق تابىسى شامامەن 200 مىڭ تەڭگەنى قۇرايتىن 24 پەن 40 جاس ارالىعىنداعى قازاقستاندىقتار.
«باعدارلاماعا قاتىسۋعا نيەت بىلدىرگەن كوپتەگەن ازاماتتاردىڭ وتىنىمدەرى بانك تاراپىنان ماقۇلدانىپ جاتقانىن كورىپ وتىرمىز. بۇل «7-20-25» باعدارلاماسىنىڭ الەۋمەتتىك باعدارلانعان، ونىڭ دەر ۋاقىتىندا قولعا الىنعانىن ءارى وتە وزەكتى ەكەندىگىن كورسەتەدى»، - دەدى يپوتەكالىق ۇيىم باسقارماسىنىڭ ءتوراعاسى قايرات التىنبەكوۆ.
ونىڭ اتاپ وتۋىنشە، جىلدىق ستاۆكاسى 7 پايىز بولعاندىقتان «7-20-25» باعدارلاماسى بويىنشا اي سايىنعى تولەم پاتەردى جالعا الۋدان ءبىرشاما ارزانعا تۇسەدى.
«بۇعان قوسا، زايەمشى ءوزىنىڭ ۇيىندە تۇراتىن بولادى جانە ەندىگى ۋاقىتتا ول پاتەر جالداۋشى ەمەس. بۇل وتە جاقسى ەكەندىگىنە كەلىسەسىزدەر عوي»، - دەيدى قايرات التىنبەكوۆ.
13- تامىزعا دەيىنگى دەرەكتەرگە سايكەس باعدارلامانىڭ سەرىكتەس بانكتەرىنە 15,4 ميلليارد تەڭگە زايم الۋعا 1323 ءوتىنىم كەلىپ ءتۇستى. ونىڭ ىشىندە سوماسى 9,7 ميلليارد تەڭگەنى قۇرايتىن 843 ءوتىنىم ماقۇلداندى. قازىرگى ۋاقىتتا ەل تۇرعىندارى يپوتەكالىق باعدارلاما ارقىلى كرەديتتى سەنتركرەديت، ا ت ف بانك، Bank RBK جانە سەسنابانك بانكتەرىنەن الا الادى.
اۆتور: مارلان جيەمباي
