ءۇي الۋعا قاجەتتى «7-20-25» باعدارلاماسىنىڭ قۇجاتتار ءتىزىمى بەلگىلى بولدى

الماتى. قازاقپارات- ق ر ۇلتتىق بانكىنىڭ ءتوراعاسى دانيار اقىشەۆ «7-20-25» باعدارلاماسى بويىنشا تۇرعىن ءۇي باعاسىنىڭ وزگەرۋ-وزگەرمەۋ ىقتيمالدىعى تۋرالى ايتتى، دەپ حابارلايدى قازاقپارات ءتىلشىسى.

«باعالىق كونيۋنكتۋرانىڭ وزگەرۋى كوپتەگەن فاكتورلارعا بايلانىستى. ونىڭ ىشىندە ۇسىنىس پەن سۇرانىسقا تىكەلەي بايلانىستى. ءبىز سۇرانىستى ىنتالاندىرىپ جاتىرمىز. جاقسى ۇسىنىس قالىپتاستىرۋ - باستى مىندەت. قۇرىلىسشىلاردىڭ كوپشىلىگى بولاشاقتا بۇل سۇرانىستى قاناعاتتاندىرا الاتىن قۋاتى بار. وسىنداي بالانس بولعان جاعدايدا باعالىق كونيۋنكتۋرانىڭ وزگەرۋىنە ىقپال ەتەتىن فاكتور بولا قويمايدى»، - دەدى دانيار اقىشەۆ.

ول تۇرعىن ءۇيدىڭ ماكسيمالدى باعاسى قويىلعانى دا باعانىڭ قۇبىلۋىنىڭ الدىن الۋ رەتىندە جاسالعانىن ايتتى.

«ياعني، باعدارلاما ارقىلى ساتىلاتىن باسپانانىڭ باعاسى شەكتەۋلى. باعدارلاما جاسالعاندا باسپانانىڭ ورتاشا باعاسى الىندى. سوندىقتان، ماكسيمالدى پلانكا ەنگىزىلدى. بۇل بولاشاقتا باعانىڭ قۇبىلۋىنا قارسى جۇمىس جاسايتىن بولادى»، - دەدى ول.

باعدارلامانىڭ وپەراتورى بولىپ تابىلاتىن «باسپانانىڭ» باسقارما ءتوراعاسى قايرات التىنبەكوۆتىڭ ايتۋىنشا، مەملەكەت باسشىسى بەلگىلەگەن «7-20-25» ءاربىر وتباسىنا باسپانا الۋدىڭ جاڭا مۇمكىندىكتەرىن بەرۋ» باعدارلاماسىنىڭ نەگىزگى ولشەمدەرى وزگەرىسسىز قالادى. ياعني، بۇل تۇپكىلىكتى مولشەرلەمە جىلدىق %7، كوميسسياسىز جانە قوسىمشا اقىسىز، تۇرعىن ءۇي قۇنىنىڭ باستاپقى جارناسى 20 پايىز، كرەديتتىڭ ەڭ ۇزاق مەرزىمى 25 جىل.

ول تۇرعىن ءۇيدى ساتىپ الۋ ءۇشىن استانا، الماتى، اقتاۋ جانە اتىراۋ قالالارى ءۇشىن باعانىڭ ەڭ جوعارى شەگى 25 ميلليون تەڭگە، ال قالعان وڭىرلەر ءۇشىن - 15 ميلليون تەڭگە دەپ بەلگىلەنگەنىن اتاپ ءوتتى. نىسانالى ينديكاتورلارعا سايكەس، يپوتەكالىق كرەديتتەردىڭ جالپى كولەمى 1 تريلليون تەڭگەنى قۇرايدى.

«باعدارلاماعا مەنشىك قۇقىعىندا باسپاناسى جانە باسقا دا يپوتەكالىق قارىزدارى جوق قازاقستاننىڭ ءاربىر ازاماتى قاتىسا الادى. باعدارلاما قاتىسۋشىسىنىڭ كاسىپكەرلىك نەمەسە ەڭبەك قىزمەتىنەن تۇراقتى راستالعان كىرىسى بولۋعا ءتيىس. قازىرگى تاڭدا «باسپانا» ەكىنشى دەڭگەيلى سەنتركرەديت، حالىق، ەۋرازيا، سەسنا، ا ت ف، ر ب ك جانە تۇرعىن ءۇي قۇرىلىسى جيناق بانكتەرىمەن كەلىسىمگە قول قويدى.

سبەربانك پەن فورتە بانك باعدارلاماعا قىزىعۋشىلىق تانىتىپ وتىر جانە تەحنيكالىق جۇمىستاردى اياقتاعاننان كەيىن «7-20-25» يپوتەكالىق باعدارلاماسى جونىندەگى كەلىسىمگە قول قويۋعا دايىن. وسىلايشا، ءبىزدىڭ ارىپتەس بانكتەرىمىزدىڭ دامىعان جەلىسىن ەسكەرە وتىرىپ، ءبىز «7-20-25» يپوتەكالىقباعدارلاماسى ەلدىڭ بارلىق وڭىرلەرىن قامتىپ، قازاقستاننىڭ كوپتەگەن ازاماتتاردىڭ تۇرعىن ءۇي الۋىنا كومەكتەسەدى دەپ ۇمىتتەنەمىز»، - دەدى ق. التىنبەكوۆ.

ونىڭ ايتۋىنشا، باعدارلاماعا قاتىسۋ ءۇشىن كەلەسى قۇجاتتاردىڭ بولۋى جونىندەگى تالاپتار ايقىندالدى.

اتاپ ايتقاندا، الەۋەتتى قارىز الۋشى بانككە ەڭبەك نەمەسە كاسىپكەرلىك قىزمەتتەن كىرىسىنىڭ بولۋىن راستايتىن قۇجاتتاردى، يپوتەكالىق تۇرعىن ءۇي قارىزدارى بويىنشا وتەلمەگەن بەرەشەگىنىڭ بولماۋى تۋرالى مالىمەتتى، تۇرعىن ءۇيىنىڭ بولماۋى تۋرالى انىقتامانى، ساتىپ الاتىن تۇرعىن ءۇي قۇجاتتارىن جانە تاۋەلسىز باعالاۋشىنىڭ باعاسىن ۇسىنۋعا ءتيىس.

«يپوتەكالىق كرەديتتەردى ساتىپ الۋ تەتىگى ارىپتەس بانكتەرمەن وڭتايلى پىسىقتالۋدا. بانكتەر يپوتەكالىق كرەديتتەردى 7-20-25 باعدارلاماسىنىڭ تالاپتارىنا سايكەس بەرەدى، «باسپانا» ءوز كەزەگىندە بانكتەردەن يپوتەكالىق كرەديتتەردى ساتىپ الادى.

ءبىز رەسمي www.baSpana72025.kz سايتىن ىسكە قوستىق، ودان بارلىق قاجەتتى اقپاراتتى الۋعا بولادى. قازىرگى ۋاقىتتا 7-20-25 باعدارلاماسىنىڭ موبيلدى قوسىمشاسى ازىرلەنۋدە، ول جۋىق ارادا App Store مەن Play ماركەت ارقىلى كوشىرىپ الۋ ءۇشىن قولجەتىمدى بولادى»، - دەدى ق. التىنبەكوۆ.

ەسكە سالساق، بۇگىن قازاقستاندا «7-20-25» باعدارلاماسى باستالعانى بەلگىلى بولدى.

ق ر ۇلتتىق بانكى ءتوراعاسى اتالعان باعدارلامانىڭ وپەراتورى «باسپانا» يپوتەكالىق ۇيىمى بولاتىنىن 5- مامىردا ايتقان ەدى.