قازاقستاندىقتارعا 6 پايىزدان اسپايتىن مولشەرلەمەمەن نەسيە بەرىلەدى
بۇل تۋرالى ۇكىمەت وتىرىسىندا ق ر ەڭبەك جانە حالىقتى الەۋمەتتىك قورعاۋ ءمينيسترى سەرىك شاپكەنوۆ ايتتى، دەپ حابارلايدى قازاقپارات ءتىلشىسى.
«مەملەكەت باسشىسى كاسىپكەرلىكتى دامىتۋ ءۇشىن ميكروقارجى ۇيىمدارىنىڭ حالىققا كرەديت بەرۋگە قاتىسۋىن جانداندىرۋ جانە «ەڭبەك» مەملەكەتتىك باعدارلاماسى تەتىكتەرىن جەتىلدىرۋ جونىندە شارالار قابىلداۋدى تاپسىردى. سونىمەن قاتار جۇمىسپەن قامتۋدىڭ جول كارتاسى بويىنشا جۇمىسقا ورنالاستىرىلعاندار تۋرالى اقپاراتتى اۆتوماتتى تۇردە تەكسەرۋدى ەنگىزۋدى تاپسىرعان بولاتىن»، - دەدى ول.
ونىڭ اتاپ وتۋىنشە، مەملەكەت باسشىسىنىڭ تاپسىرمالارىن ورىنداۋ ماقساتىندا 2021 -جىلدىڭ ناۋرىز ايىنىڭ سوڭىنا دەيىن «ەڭبەك» مەملەكەتتىك باعدارلاماسىنا مەملەكەتتىڭ جانە «اتامەكەن» ۇ ك پ- نىڭ قاتىسۋىمەن ميكروقارجى ۇيىمدار قۇرۋ بولىگىنە وزگەرىستەر ەنگىزىلەدى جانە سوڭعى قارىز الۋشىعا 6 پايىزدان اسپايتىن سىياقى مولشەرىمەن نەسيە بەرىلەتىن بولادى.
«قازىرگى ۋاقىتتا جوبا مەملەكەتتىك ورگاندارمەن كەلىسىلىپ جاتىر. بۇل رەتتە جەرگىلىكتى اتقارۋشى ورگاندارمەن جانە «اتامەكەنمەن» تۇراقتى نەگىزدە قارىز الۋشىلاردىڭ جوبالارىن سۇيەمەلدەۋ جانە تۇرعىندارعا ميكروكرەديت بەرۋ بويىنشا ميكروقارجى ۇيىمدارىنا مونيتورينگ جۇرگىزۋدى قامتاماسىز ەتۋ قاجەت. سونىمەن قاتار مينيسترلىكپەن جۇمىسپەن قامتۋ جانە كاسىپكەرلىكتى قولداۋ جونىندەگى جاڭا تاسىلدەر مەن تەتىكتەردى قاراستىرا وتىرىپ، 2022-2026 -جىلدارعا ارنالعان «ەڭبەك» ۇلتتىق جوباسى ازىرلەنەدى»، دەدى سەرىك شاپكەنوۆ.
بيىل جۇمىسپەن قامتۋدىڭ جول كارتاسى اياسىندا ينفراقۇرىلىمدىق جوبالاردى ىرىكتەۋ، جۇمىسسىزداردى جۇمىسقا ورنالاستىرۋ جانە شاعىن نەسيەلەندىرۋ تولىعىمەن قايتا قارالىپ، جاڭا تاسىلدەر ازىرلەندى. وسى جىلعا 27 مىڭ جۇمىس ورنىن قۇرا وتىرىپ، 331 ينفراقۇرىلىمدىق جوبانى ىسكە اسىرۋ جوسپارلانىپ وتىر.
