اداي جانە قوستاناي تۇقىمدى جىلقىلاردى زەرتتەۋگە 682 ميلليون تەڭگە بولىنەدى

استانا. قازاقپارات - پرەمەر-مينيستر ءاليحان سمايىلوۆ سەنات دەپۋتاتتارىنىڭ ساۋالىنا جولداعان جاۋابىندا اداي جانە قوستاناي تۇقىمدى جىلقىلارىن عىلىمي زەرتتەۋگە 682,5 ميلليون تەڭگە بولىنەتىنىن ايتتى، دەپ حابارلايدى قازاقپارات ءتىلشىسى.

«قوستاناي جىلقىسىنىڭ تۇقىمىن ەسەپكە الۋ، اسىل تۇقىمدى ەكەنى تۋرالى كۋالىك پەن مارتەبە بەرۋ، باعالاۋ، سونداي-اق سىناقتان وتكىزۋ ماسەلەلەرى اسىل تۇقىمدى مال شارۋاشىلىعى سالاسىنداعى قولدانىستاعى زاڭنامامەن رەتتەلگەن. اۋىل شارۋاشىلىعى مينيسترلىگى 2024-2026-جىلدارعا ارنالعان باعدارلامالىق قارجىلاندىرۋ اياسىندا «اداي جانە قوستاناي تەكتى قازاقي جىلقىنىڭ جۇيرىكتىگىن جەتىلدىرۋ جانە ساقتاۋ» عىلىمي-زەرتتەۋ باعدارلاماسىن ىسكە اسىرۋدى جوسپارلاپ وتىر. وعان شامامەن 682,5 ميلليون تەڭگە ءبولۋ كوزدەلگەن»، - دەپ جازىلعان ۇكىمەت باسشىسىنىڭ جاۋابىندا.

ەسكە سالساق، بىلتىر پرەزيدەنت قاسىم-جومارت توقايەۆ ۇكىمەتكە اداي جىلقىسىن عىلىمي تۇردە اسىل تۇقىمدى مال رەتىندە تانىپ، سانىن كوبەيتۋ ءۇشىن ءتيىستى جۇمىستاردى جەدەل قولعا الۋدى تاپسىرعان بولاتىن.