جەر رەفورماسى جونىندەگى كوميسسيانىڭ ەكىنشى وتىرىسىنا 67 مۇشە قاتىسۋدا

استانا. قازاقپارات - بۇگىن ق ر پرەمەر- ءمينيسترىنىڭ ءبىرىنشى ورىنباسارى، جەر رەفورماسى بويىنشا رەسپۋبليكالىق كوميسسيا ءتوراعاسى باقىتجان ساعىنتايەۆتىڭ جەتەكشىلىگىمەن كوميسسيانىڭ ەكىنشى وتىرىسى باستالدى.

«كوميسسيانىڭ 75 مۇشەسىنىڭ 67 سى ءوزىنىڭ وتىرىسقا قاتىساتىنىن راستاعان. ءبىراز ادامدار سۇحبات بەرىپ جاتىر، جولدا كەلە جاتقاندارى بار. 7 ادام بەلگىلى سەبەپتەرمەن قاتىسا الماي وتىر. ونىڭ ەكەۋى ءوز ەرىكتەرىمەن كوميسسيا قۇرامىنان شىعاتىندارىن ايتقان. قالعاندارى دەنساۋلىق جاعدايىنا بايلانىستى وتكەن جولى دا قاتىسا الماعان بولاتىن. سول سەبەپتەن ول كىسىلەرگە تەزىرەك ساۋىعىپ، جۇمىسىمىزعا قوسىلۋىن كۇتەمىز»، - دەدى ب. ساعىنتايەۆ.

كوميسسيا ءتوراعاسىنىڭ ايتۋىنشا، بۇگىنگى كۇنى رەفورمالار بويىنشا ايماقتاردا دا قارقىندى جۇمىستار اتقارىلعان. بارلىق وبلىس ورتالىقتارى مەن استانا جانە الماتى قالالارىندا وتىرىستار ءوتتى. «كەشە وبلىستارمەن سەلەكتورلىق كەڭەس وتكىزىپ، كوميسسيا مەن جەرگىلىكتى جەرلەردەگى قوعامدىق كەڭەستەردىڭ قاتىناسىنا قاتىستى ماعلۇماتتار بەردىك. قوعامدىق كەڭەستەرگە دە كەلىپ تۇسكەن ۇسىنىس، پىكىرلەر جيناقتالادى، كوميسسيا شتابىنا ۇسىنىلاتىن بولادى»، دەدى ب. ساعىنتايەۆ.

اۆتور: قانات مامەتقازى ۇلى