اقتوعايدا بيىل 61 مىڭ توننا مىس وڭدەلدى - ش ق و
اتاپ ايتقاندا، 2018 -جىلدىڭ 6 ايىندا مۇندا 61 مىڭ توننا مىس وڭدەلگەن، دەپ حابارلايدى قازاقپارات ءتىلشىسى.
وتكەن جىلعا قاراعاندا بيىل كەن قۇرامىنداعى مىستىڭ ۇلەسى ازايا باستاعان. بىلتىر بۇل كورسەتكىش 0,75 پايىز كولەمىندە بولسا، بيىل 0,62 پايىزدى قۇراپ وتىر. سوعان قاراماستان، جالپى وندىرىستە ءوسىم بار. بۇل فابريكانىڭ جۇمىس قارقىنى كۇشەيگەنىن بىلدىرەدى. العاشقى 6 ايدا سۋلفيدتى كەننەن 49 مىڭ توننا مىس، وكسيدتى كەننەن 11,5 مىڭ توننا مىس الىنىپ وتىر.
جىل كولەمىندە اقتوعاي كەنىشىنەن 110-130 مىڭ توننا مىس الۋ كوزدەلگەن. جارتى جىلدىڭ كورسەتكىشى سول مەجەنى ورىنداۋعا ۇلكەن مۇمكىندىك تۋعىزىپ وتىر. وندىرىلگەن مىس كولەمى - 61 مىڭ توننا. جالپى اقتوعايداعى كەن قورى 28 جىلعا جەتەدى دەپ ەسەپتەلگەن. 2021-2027 -جىلدار ارالىعىندا كەشەننىڭ ەكى بىردەي كەن بايىتۋ فابريكاسى تولىق ىسكە قوسىلىپ، جوبالىق قۋاتىنا ەنۋى ءتيىس. بۇل شاقتا جىلىنا 190 مىڭ توننا مىس الىنادى دەگەن جوسپار بار.
«2018 - جىلدىڭ ءبىرىنشى جارتىسىندا ءبىز جوعارى وپەراتسيالىق كورسەتكىشتەرگە قول جەتكىزدىك. اقتوعاي بايىتۋ فابريكاسىنىڭ جوعارى وتكىزۋ مۇمكىندىگى 2017 - جىلدىڭ ءبىرىنشى جارتىسىمەن سالىستىرعاندا 18 پايىزدىق وسىمگە سەبەپكەر بولدى. ىلەسپە ونىمدەر ءوندىرۋ باعىتىندا دا جۇمىس جانداندى» - دەيدى KAZ Minerals توبىنىڭ باسقارما ءتوراعاسى ەندريۋ ساۋزام.
اۆتور: ەسىمجان ناقتىباي
