قازاقستان اۋعان ەلىنە 600 مىڭ توننا استىق بەرەدى - ن. نازاربايەۆ
بۇل تۋرالى بۇگىن اقوردادا قازاقستانعا رەسمي ساپارمەن كەلگەن اۋعانستان يسلام رەسپۋبليكاسىنىڭ پرەزيدەنتى موحامماد اشراف عانيمەن كەلىسسوزدەردەن كەيىنگى بىرلەسكەن مالىمدەمە بارىسىندا ەلباسى نۇرسۇلتان نازاربايەۆ ايتتى.
«بىزدەردىڭ كەزدەسۋىمىزدە ەلدەرىمىز اراسىنداعى قارىم-قاتىناستى جانداندىرۋ، دوستىق، سەنىم جاعدايىن كوتەرۋ ماسەلەلەرى قارالدى. ويتكەنى تۇرىپ جاتقان ءوڭىرىمىز بىرەۋ. ءبارىمىزدىڭ سالتىمىز، عۇرپىمىز، ەكونوميكامىزدىڭ ءتۇرى، جاعدايى بىردەي. سوندىقتان ءبىز سىزبەنەن بۇگىن ۇلكەن، تەرەڭدەتىلگەن كەلىسسوزدەر جۇرگىزدىك»، - دەدى ق ر پرەزيدەنتى.
مەملەكەت باسشىسىنىڭ ايتۋىنشا، كەلىسسوزدەر بارىسىندا ەكىجاقتى جانە كوپجاقتى ماسەلەلەر تالقىلانعان. سونىمەن قاتار ەكى ەلدىڭ ەكونوميكالىق قارىم-قاتىناسىن جانداندىرۋعا باسا نازار اۋدارىلعان.
«قازىرگى 400 ميلليون دوللارعا جەتپەيتىن ساۋدا ول ارينە، وتە از. سوندىقتان ءبىز سىزبەنەن ول جونىندەگى كوپتەگەن ماسەلەلەردى كەلىستىك. قازاقستان اۋعانستانعا 600 مىڭ توننادان ارتىق ءبيداي تاسيتىن بولدى. ءبىز بۇگىن كەلىستىك. جول سالۋ، قۇرىلىس ماتەريالدارىن بەرۋ، تەمىر جول، لوكوموتيۆ، ۆاگوندارمەن كومەكتەسۋ ماسەلەسىن ۋاعدالاستىق»، - دەدى ەلباسى.
اۆتور: مارلان جيەمباي
