جۇمىس بەرۋشى تولەيتىن 5 پايىزدىق زەينەتاقى جارناسى قىزمەتكەردىڭ مەنشىگى بولادى
بۇل تۋرالى ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ الەۋمەتتىك ساقتاندىرۋ، بازالىق، الەۋمەتتىك جانە زەينەتاقىمەن قامسىزداندىرۋ ساياساتى دەپارتامەنتىنىڭ ديرەكتورى ۆيكتوريا شەگاي ايتتى.
«بۇل جەردە جۇمىس ىستەيتىن ۇيىمداردىڭ ءبارى، سونىڭ ىشىندە مەملەكەتتىك، كۆازيمەملەكەتتىك سەكتور، جەكە سەكتور تۋرالى ايتىپ وتىرمىز. وكىنىشكە قاراي، بۇگىنگى تاڭدا الەمدە كەڭىنەن تارالعان حالىقارالىق تاجىريبەنىڭ بولۋىنا قاراماستان، جۇمىس بەرۋشى ءوز قىزمەتكەرلەرىن زەينەتاقىمەن قامتاماسىز ەتۋگە ءىس جۇزىندە قاتىسپايدى. بۇل فاكت. مەملەكەت، ادامنىڭ ءوزى جانە جۇمىس بەرۋشى اراسىندا جاۋاپكەرشىلىكتى بولەتىن تەڭدەستىرىلگەن جۇيەنى ءىس جۇزىندە قۇرۋ ءۇشىن ءبىز ونى زەينەتاقى جۇيەسىندە دە ورناتۋدى ۇسىنىپ وتىرمىز»، - دەپ ءتۇسىندىردى ساراپشى.
%5 جارنا 2023-جىلدىڭ قاڭتارىنان باستاپ ەنگىزىلمەك. مينيسترلىك وكىلى بۇل مەرزىم بۇعان دەيىن 2 رەت شەگەرىلگەنىن ەسكە سالدى.
«ءىس جۇزىندە بۇل تۇزەتۋلەر زاڭنامالىق دەڭگەيدە قابىلدانىپ قويعان. نەگىزى، 2018-جىلى قولدانىسقا ەنۋى كەرەك ەدى. ول كەزدە مىندەتتى الەۋمەتتىك-مەديتسينالىق ساقتاندىرۋ قورىنا جۇمىس بەرۋشىلەردىڭ جارنا تولەيتىنى ەسكەرىلىپ، 2020-جىلعا شەگەرىلگەنىن بىلەسىزدەر. ول كەز پاندەمياعا ءدوپ كەلدى دە، نورما ەندى 2023-جىلدىڭ 1- قاڭتارىنان كۇشىنە ەنەتىن بولىپ وتىر. تۇجىرىمداما جوباسى اياسىندا ءبىز قانداي وزگەرىستەر قاراستىرىپ جاتىرمىز؟ ءبىز زەينەتاقى جيناقتاۋشىلاردىڭ شوتىنا اۋدارىلاتىن جارنالاردىڭ مولشەرى مەن بۇكىل مەحانيزمدى تۇگەل كورسەتەمىز. بۇعان دەيىن تۇجىرىمدامادا جارنالاردىڭ %5 تولەم اۋدارىلماعان قىزمەتكەردىڭ مەنشىگى ەمەس دەپ قاراستىرىلسا، ءبىز ۇسىنىپ وتىرعان وزگەرىستەر بويىنشا ونى ءاربىر قىزمەتكەردىڭ جەكە جيناقتارىن تولىقتىرۋشى جارنا رەتىندە قاراۋدى ۇسىنىپ وتىر»، - دەيدى ۆيكتوريا شەگاي.
ياعني، جۇمىس بەرۋشى اۋدارعان 5 پايىزدىق زەينەتاقى جارناسى قىزمەتكەردىڭ مەنشىگى بولماق.
«تولەم كىم ءۇشىن جۇرگىزىلسە، سونىڭ پايداسىنا جارنالار جەكە زەينەتاقى شوتىندا كورسەتىلەتىن بولادى. بۇل ءىس جۇزىندە ونىڭ مەنشىگى بولادى، وعان بەلگىلى ءبىر جاعدايلاردا قول جەتكىزۋگە قۇقىلى. سونىڭ ءبىرى - جالپىعا بىردەي بەلگىلەنگەن زەينەتكەرلىك جاسقا جەتۋ»، - دەپ اتاپ ءوتتى مينيسترلىك مامانى.
ونىڭ ايتۋىنا قاراعاندا، قىزمەتكەرلەر زەينەتاقى شوتتارىنا ءتيىستى جارنالاردىڭ ءتۇسىپ تۇرۋىنا مۇددەلى بولۋى كەرەك.
«ءتيىستى تاپسىرمالار بويىنشا، زەينەتاقى جيناقتارىنىڭ ءبىر بولىگىن پايدالانۋ قۇقىعى بەرىلىپ، بۇل ازاماتتاردىڭ زەينەتاقى جۇيەسىنە دەگەن سەنىمىن ارتتىردى. جەكە شوتتان ءۇزىندى-كوشىرمەنى قاراۋ ءۇشىن وتىنىشتەردىڭ سانى قانشالىقتى ارتقانىن كورىپ وتىرمىز. بىزدە ازاماتتار ءۇشىن تولەم ۋاقتىلى جۇرگىزىلمەگەندە نەمەسە ول مۇلدەم جۇرگىزىلمەگەندە وتىنىشتەر سانى ارتتى»، - دەيدى ۆيكتوريا شەگاي.