باقىت سۇلتانوۆ: ورتتەن قازا تاپقان 5 بالانىڭ اتا-اناسىنا بارلىق كومەك كورسەتىلەدى
«بۇگىنگى كۇنى استانا قالاسى اكىمدىگى تاراپىنان بارلىق ءتيىستى كومەك بەرىلۋدە. اتاپ ايتقاندا، جەرلەۋ ءراسىمى، اس بەرۋ ۇيىمداستىرىلىپ، ماتەريالدىق جانە پسيحولوگيالىق تۇرعىدا كومەك كورسەتىلۋدە. ءتيىستى كوميسسيا قۇرىلدى. قازىرگى كۇنى اتا-انالارىمەن دە جۇمىس جاساپ جاتىرمىز. ارى قاراي قانداي جاردەم كورسەتىلەتىندىگى كەلەسى شارالاردا قابىلداناتىن بولادى. جان-جاقتى كومەك كورسەتىلەدى»، - دەپ اتاپ ءوتتى قالا باسشىسى.
سونىمەن قاتار ول بۇل ماسەلەنىڭ قايتالانۋىنا جول بەرمەۋ ءۇشىن ءتيىستى جۇمىستار دا جۇيەلى جاسالىپ جاتقانىن ايتتى.
«اۋا رايىنىڭ كۇرت سۋىتۋىنا وراي جەر ۇيلەردە پەشتى جىلىتۋعا بارىنشا قوسۋعا بايلانىستى ءورت شىعۋ مۇمكىنشىلىگى ارتۋدا. سوندىقتان بۇل جاعدايلاردىڭ الدىن الۋ ءۇشىن اۋدان اكىمدەرىنە، توتەنشە جاعدايلار دەپارتامەنتىنىڭ، پوليتسيا دەپارتامەنتىنىڭ باسشىلارىنا بىرلەسىپ، تۇنگى رەيد جۇرگىزۋ جۇمىستارى تاپسىرىلدى. ال كۇندىزگى بارلىق وت جاعىپ وتىرعان جەر ۇيلەر مەن نىساندارداعى تۇرعىندارعا ءورت قاۋىپسىزدىگى ەرەجەلەرىن ساقتاۋ ءتۇسىندىرىلىپ، تەكسەرۋ جۇرگىزۋ جۇمىستارى جالعاساتىن بولادى»، - دەدى باقىت سۇلتانوۆ.
ەسكە سالا كەتەيىك، 4- اقپان كۇنى تۇندە ەلوردانىڭ سارىارقا اۋدانىنداعى «كوكتال-1» تۇرعىن ءۇي الابىندا جەكە ءۇيدىڭ اۋلاسىندا تۇرعىزىلعان ۋاقىتشا باسپانادا ءورت شىقتى. ءورتتى ءسوندىرۋ بارىسىندا 2006، 2008، 2014، 2016، 2018-جىلعى 5 قىز بالانىڭ دەنەسى تابىلدى.
ولاردىڭ كىشىسى نەبارى ءۇش ايلىق ءسابي ەدى. ءورت كەزىندە بەس بالانىڭ اتا-اناسى تۇنگى جۇمىستا بولعان.