نازاربايەۆ ترامپقا: ءسىز تاڭعالارلىق سالىق رەفورماسىن جاسادىڭىز، ونى 5 جىل بۇرىن جۇزەگە اسىرعانمىن

ۆاشينگتون. قازاقپارات - قازاقستان مەن ا ق ش ىسكەرلىك توپتارىنىڭ وتىرىسىندا 7 ميلليارد دوللاردىڭ كەلىسىمشارتى جاسالادى.

بۇل تۋرالى بۇگىن اق ۇيدە امەريكا قۇراما شتاتتارىنىڭ پرەزيدەنتى دونالد ترامپپەن ەكەۋارا كەزدەسۋدەن كەيىن بىرلەسكەن مالىمدەمە جاساۋ بارىسىندا قازاقستان پرەزيدەنتى نۇرسۇلتان نازاربايەۆ ايتتى، دەپ حابارلايدى قازاقپارات.

مەملەكەت باسشىسى قازاقستان مەن ا ق ش- تىڭ ەكىجاقتى قارىم-قاتىناسىندا ەكونوميكالىق بايلانىس ماڭىزدى ءرول وينايتىندىعىن اتاپ ءوتتى.

«قازاقستاندا امەريكالىق كومپانيالاردىڭ جۇمىس ىستەگەنىنە ءبىراز بولدى. ولار ەل ەكونوميكاسىنا 50 ميلليارد دوللاردان استام قارجى قۇيىپ، بەس مىڭعا جۋىق جۇمىس ورنىنىڭ اشىلۋىنا مۇمكىندىك جاسادى. بۇگىنگى دوڭگەلەك ۇستەلدە 7 ميلليارد دوللار كولەمىندەگى 20 كەلىسىمشارتقا قول جەتكىزۋدى جوسپارلاپ وتىرمىز. بۇل كاسىپكەرلەرىمىز اراسىنداعى ءوزارا بايلانىستىڭ دەڭگەيىن كورسەتەدى. ءبىز بوينگ ۇشاقتارىن ساتىپ الۋدى، قازاقستاندا 900 ەلەكتروۆوز شىعارۋدى جانە اۋىل شارۋاشىلىعى سالاسىنداعى بايلانىستى ايتىپ وتىرمىز»، - دەدى ەلباسى.

نۇرسۇلتان نازاربايەۆ قازاقستان امەريكالىقتارعا ۆيزاسىز رەجىم ەنگىزگەنىن، ەندى مۇنداي قارىمتا قادامدى ا ق ش تاراپىنان كۇتەتىنىن باسا ايتتى. الداعى ۋاقىتتا ەكى ەل اراسىندا تىكەلەي اۋە قاتىناسى ورناتىلاتىنىن ەسكە سالدى.

«قۇرمەتتى، پرەزيدەنت! ءسوز سوڭىندا ەلدەرىڭىزدىڭ ەكونوميكالىق تابىستارعا قول جەتكىزۋىمەن قۇتتىقتايمىن. ءسىز تاڭعالارلىق سالىق رەفورماسىن جاسادىڭىز. بۇل قادامىڭىزدى قولدايمىن، ويتكەنى ونداي رەفورمانى مەن بەس جىل بۇرىن جاساعان بولاتىنمىن. بىزدە كورپوراتيۆتىك سالىق 20 پايىز، تابىس سالىعى 10 پايىز. ءسىزدى توعىزىنشى نەمەرەڭىزدىڭ دۇنيەگە كەلۋىمەن قۇتتىقتايمىن. وتكەن جىلى مەنىڭ ونىنشى نەمەرەم جارىق دۇنيە ەسىگىن اشقان بولاتىن»، - دەدى قازاقستان پرەزيدەنتى.

اۆتور: مارلان جيەمباي