ەلباسى قازاقستاننىڭ ءۇشىنشى جاڭعىرۋىنىڭ 5 نەگىزگى باسىمدىعىن ايقىندادى

استانا. قازاقپارات - اقوردانىڭ رەسمي سايتىندا پرەزيدەنت نۇرسۇلتان نازاربايەۆتىڭ ەل حالقىنا ارناعان «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» تاقىرىبىنداعى جولداۋى جاريالاندى.

 نۇرسۇلتان نازاربايەۆ ءوزىنىڭ ەل حالقىنا ارناعان جولداۋىندا قازاقستاننىڭ ءۇشىنشى جاڭعىرۋىنىڭ 5 نەگىزگى باسىمدىقتارىن ايقىندادى، دەپ حابارلايدى قازاقپارات.

الەمدە كەزەكتى، ءتورتىنشى ونەركاسىپتىك ريەۆوليۋتسيا باستالعانىن اتاپ وتكەن ەلباسى، ەكونوميكانى جاپپاي سيفرلاندىرۋ تۇتاس سالانىڭ جويىلۋىنا جانە مۇلدە جاڭا سالانىڭ پايدا بولۋىنا الىپ كەلەتىنىن ايتتى.

«ءبىزدىڭ كوز الدىمىزدا بولىپ جاتقان ۇلى وزگەرىستەر - ءارى تاريحي سىن- قاتەر، ءارى ۇلتقا بەرىلگەن مۇمكىندىك. بۇگىن مەن قازاقستاندى ءۇشىنشى جاڭعىرتۋ جونىندە مىندەت قويىپ وتىرمىن. ەلدىڭ جاھاندىق باسەكەگە قابىلەتتىلىگىن قامتاماسىز ەتەتىن ەكونوميكالىق ءوسىمنىڭ جاڭا مودەلىن قۇرۋ قاجەت»، - دەپ اتاپ ءوتتى پرەزيدەنت.

مەملەكەت باسشىسىنىڭ ايتۋىنشا، قازىرگى كەزدە كوپتەگەن ەلدەر وسىنداي مىندەتتى ورىنداۋعا ۇمتىلۋدا.

«ءوسىمنىڭ جاڭا مودەلىنە كوشۋ ءتاسىلى ءار جەردە ءار ءتۇرلى ەكەنىنە سەنىمدىمىن. ءبىز ءوزىمىزدىڭ مىقتى تۇستارىمىزدى پايدالانىپ، تاۋەلسىزدىگىمىزدىڭ 25 جىلىندا بىرگە قالىپتاستىرعان الەۋەتىمىزدى جوعالتىپ الماۋىمىز كەرەك قوي.

بۇل جاڭعىرۋ - قازىرگى جاھاندىق سىن- قاتەرلەرمەن كۇرەس جوسپارى ەمەس، بولاشاققا، «قازاقستان-2050» ستراتەگياسى ماقساتتارىنا باستايتىن سەنىمدى كوپىر بولماق. ول ۇلت جوسپارى - «100 ناقتى قادام» بازاسىندا وتكىزىلەدى.

 مەن ونىڭ بەس نەگىزگى باسىمدىعىن كورىپ وتىرمىن. ولار ەكونوميكانىڭ الەمدىك ءوسىمىنىڭ ورتا دەڭگەيدەن جوعارى قارقىنىن قامتاماسىز ەتۋگە جانە 30 وزىق ەلدىڭ قاتارىنا قاراي تۇراقتى تۇردە ىلگەرىلەۋگە لايىقتالعان»، - دەپ مالىمدەدى ەلباسى.

اۆتور: گۇلميرا الياكپاروۆا