مەملەكەت باسشىسى: قازاقستان ءۇندىستانعا 5 مىڭ توننا ۋران جەتكىزەدى
ەلباسى ءوز سوزىندە ءۇندىستان پرەمەر- ءمينيسترى ساپارى اياسىندا وتكەن بيزنەس-فورۋمنىڭ ەكىجاقتى ىنتىماقتاستىقتى ارتتىرۋعا قوسىمشا نەگىز قالايتىندىعىن باسا ايتتى.
«ءبىز بۇگىن ديالوگقا دايىن ەكەندىگىمىزدى، كوزقاراسىمىزدىڭ جاڭا جولدارىن ىزدەيتىندىگىمىزدى كەزدەسۋدە راستادىق. ەكى اراداعى قارىم-قاتىناس، مۇناي-گاز، مەتاللۋرگيا، تاۋ-كەن ءوندىرىسى، ينفراقۇرىلىم، بانك، ازىق-تۇلىك، ەلەكتر ەنەرگياسى سالالارى تۋرالى اڭگىمەلەستىك»، - دەدى مەملەكەت باسشىسى.
سونىمەن بىرگە قازاقستان كوشباسشىسى ساتبايەۆ مۇناي بلوگىن بارلاۋ ماقساتىنداعى بۇرعىلاۋ جۇمىستارى ءۇندىستان تارابىنىڭ قاتىسۋمەن باستالعانىن اتاپ ءوتتى.
«2015-2019-جىلدارى ءۇندىستانعا 5 مىڭ توننا ۋران جەتكىزۋ جونىندەگى كەلىسىم-شارتتارعا قول قويىلدى. بۇل ەنەرگەتيكا سالاسىنداعى ىنتىماقتاستىقتىڭ جۇيەلى دامۋىنىڭ دالەلى بولىپ سانالادى»، - دەدى ن. نازاربايەۆ.
اۆتور: مارلان جيەمباي
