قازاق حاندىعىنىڭ 550 جىلدىعى مەرەيتويىنا دەمەۋشىلەر جۇمىلدىرىلىپ جاتىر
بۇل تۋرالى بۇگىن ل. ن. گۋميليەۆ اتىنداعى ە ۇ ۋ- دا «قازاق حاندىعى تۇسىنداعى حانىمدار مەن ارۋلار» اتتى رەسپۋبليكالىق عىلىمي-تاجىريبەلىك كونفەرەنسيادا ق ر مادەنيەت جانە سپورت مينيسترلىگىنىڭ جاۋاپتى حاتشىسى قۋاتجان ۋاليەۆ ءمالىم ەتتى.
مەرەيتويلىق نەگىزگى شارالاردى ەلباسىنىڭ قاتىسۋىمەن 2015-جىلعى قىركۇيەكتە استانا جانە تاراز قالالارىندا وتكىزۋ جوسپارلانىپ وتىرعانىن جەتكىزگەن ول، «تاراز قالاسىندا مادەني-سپورتتىق جانە بۇقارالىق ءىس-شارالار، سالتاناتتى جينالىس، مەرەكەلىك كونسەرت، عىلىمي-تاجىريبەلىك كونفەرەنسيالار وتەدى، سونداي-اق وسىنداي شارالار استانا قالاسىندا دا وتكىزىلەدى. بۇگىندە وسى ءىس-شارالاردى وتكىزۋ ءۇشىن جان-جاقتى دايىندىق جۇمىستارى جۇرگىزىلۋدە»، - دەدى.
قازاق حاندىعىنا 550 جىل مونۋمەنتىنىڭ ۇزدىك جوباسىنا رەسپۋبليكالىق بايقاۋ جاريالانىپ، ونىڭ ىشىنەن ۇزدىك جوبا تاڭدالعانىنا توقتالعان جاۋاپتى حاتشى، «قازىرگى ۋاقىتتا مونۋمەنت ورناتىلاتىن جەردە قۇرىلىس جۇمىستارى جۇرگىزىلۋدە»، - دەدى.
بۇدان بۇرىن حابارلانعانداي، اتالعان مونۋمەنت تاراز قالاسىندا ورناتىلادى.
قۋاتجان ۋاليەۆتىڭ سوزىنە قاراعاندا، رەسپۋبليكالىق ماڭىزى بار تاريحي جانە مادەنيەت ەسكەرتكىش بولىپ تابىلاتىن كونە تاراز قالاشىعىندا ارحەولوگيالىق زەرتتەۋلەر، رەستاۆراتسيا جانە كونسەرۆاتسيا جۇمىستارىن جۇرگىزۋ باستالدى.
«مۇنىمەن قوسا، قازاق حاندىعىنىڭ 550 جىلدىعى مەرەيتويىنا ارنالعان ءىس-شارالاردى قارجىلاندىرۋعا دەمەۋشىلەردى جۇمىلدىرۋ جۇمىسى بويىنشا مادەنيەت جانە سپورت مينيسترلىگى، جامبىل وبلىسىنىڭ اكىمدىگى جانە باسقا مەملەكەتتىك ورگاندار ءتيىستى جۇمىستار جۇرگىزۋدە. وسى باعىتتا دەمەۋشىلەرمەن جۇمىستاردى ۇيلەستىرۋ جانە تيىمدى جۇرگىزۋ ماقساتىندا ارنايى «ماڭگىلىك ەل» قوعامدىق قورى قۇرىلدى. قوعامدىق قوردىڭ قىزمەتىن مىرزاتاي جولداسبەكوۆ، اناتولي باشماكوۆ، سەرىك ساپيەۆ، ايمان مۇساحودجايەۆا سياقتى كورنەكتى مەملەكەت جانە قوعام قايراتكەرلەرى, تانىمال سپورت جانە ونەر قايراتكەرلەرىنەن قۇرالعان قۇرىلتايشى كەڭەس باقىلاۋدا»، - دەدى جاۋاپتى حاتشى. بۇل تۇرعىدا ول دەمەۋشىلىك كومپانيالار مەرەيتوي شارالارىنا قاتىسىپ جاتقاندىعىن جەتكىزدى.
اۆتور: رۋسلان عابباسوۆ
