ب. ساپاربايەۆتىڭ جامبىل وبلىسىنا جۇمىس ساپارى بارىسىندا قازاق حاندىعىنىڭ 550 جىلدىعىنا دايىندىق بارىسى تالقىلاندى
ق ر پرەمەر-ءمينيسترىنىڭ ورىنباسارى بەردىبەك ساپاربايەۆ ايماقتار بويىنشا جۇمىس ساپارى اياسىندا جامبىل وبلىسىنا باردى.
تارازدا ۆيتسە-پرەمەر قازاق حاندىعىنىڭ قۇرىلۋىنىڭ 550 جىلدىعىن مەرەكەلەۋگە دايىندىق بويىنشا ءىس-شارالار جوسپارىن جۇزەگە اسىرۋ بارىسىمەن تانىستى.
پرەمەر-ءمينيستردىڭ ورىنباسارى ات-سپورتتىق ءىس-شارالار وتەتىن «اتشابار» يپپودرومىندا جانە تاريحي-درامالىق سپەكتاكل وتەتىن «جاستار» ستاديونىندا بولىپ، نىسانداردىڭ دايىندىعىن قاراپ شىقتى. ول سونداي-اق وبلىس ورتالىعىنىڭ تاريحي بولىگىندە ورناتىلاتىن «قازاق حاندىعى» مونۋمەنتىنىڭ ەسكيزدىك ماكەتىن قاراپ شىقتى.
وعان قوسا، ۆيتسە-پرەمەر تارازدىڭ الەۋمەتتىك جانە مادەني سالاسىنداعى ءبىرقاتار نىسانداردى ارالادى.
ب. ساپاربايەۆ ءدۋالدى وقىتۋ جۇيەسى ەنگىزىلگەن حيميا-تەحنولوگيالىق كوللەدجدە، وبلىستىق دراما تەاترىندا بولىپ، سونداي-اق وبلىستىق پەريناتالدىق ورتالىق، «ەجەلگى تاراز» مۋزەيى قۇرىلىسىنىڭ جانە قىزىلوردا وبلىسى قاراجاتى ەسەبىنەن جۇزەگە اسىرىلعان «قاراحان بابا» ماۆزولەيى جانىنداعى گۇلزاردى اباتتاندىرۋ بارىسىمەن تانىستى.
جۇمىس ساپارى كەڭەسپەن اياقتالدى، وندا ايماقتىڭ الەۋمەتتىك سالاسىن رەفورمالاۋ، جۇمىس ورىندارىن قىسقارتۋعا جول بەرمەۋ جانە الەۋمەتتىك تۇراقتىلىقتى ساقتاۋ جونىندەگى ءۇش جاقتى مەموراندۋمداردى ورىنداۋ ماسەلەلەرى قارالىپ، سونداي-اق قازاق حاندىعىنىڭ 550 جىلدىعىن مەرەكەلەۋ بارىسى تالقىلاندى.
كەڭەس قورىتىندىسى بويىنشا ب. ساپاربايەۆ ورتالىق جانە جەرگىلىكتى ورگاندارعا ءبىرقاتار تاپسىرمالار بەردى. ول وبلىس اكىمدىگى تاراپىنان جاسالعان مەموراندۋمداردىڭ مىندەتتەرىن ورىنداۋدى، اسىرەسە جۇمىسپەن قامتۋعا، جۇمىس ورىندارىن ساقتاۋعا، جالاقىنى ۋاقىتىلى تولەۋگە، قازاقستاندىق قامتۋدى ارتتىرۋعا قاتىستى قاتال باقىلاۋ قاجەتتىگىن باسا ايتتى.
ول حالىقتىڭ ءال-اۋقاتى ءوسىمىن ارتتىرۋ ءۇشىن بارلىق رەسۋرستار مەن مۇمكىندىكتەردى پايدالانۋعا قاتىستى مەملەكەت باسشىسىنىڭ تاپسىرمالارىن جۇزەگە اسىرۋدىڭ ماڭىزدىلىعىنا ەرەكشە نازار اۋداردى.
