قاڭتار وقيعاسى: ارنايى پروكۋرورلار جاپپاي تارتىپسىزدىكتەر بويىنشا 53 ءىستى قاراپ جاتىر
بۇل تۋرالى ق ر باس پروكۋراتۋراسى قىلمىستىق قۋدالاۋ قىزمەتى باسشىسىنىڭ ورىنباسارى ەلدوس قيلىمجانوۆ ءمالىم ەتتى، دەپ حابارلايدى قازاقپارات ءتىلشىسى.
«باس پروكۋراتۋرا قاڭتار وقيعالارىنا بايلانىستى قىلمىستىق ىستەردى تەرگەۋ بارىسى تۋرالى حابارلاۋدى جالعاستىرىپ كەلەدى. جالپى، وسى وقيعالار بويىنشا ەلىمىزدە 5 مىڭنان استام سوتقا دەيىنگى تەرگەپ-تەكسەرۋ تىركەلدى. مەملەكەتتىك وبەكتىلەردى ورتتەۋ، مۇلىكتەردى جويۋ جانە تەرروريزم اكتىلەرى الماتى، شىمكەنت قالالارىندا، اقتوبە، اتىراۋ، الماتى، جامبىل، قىزىلوردا جانە شىعىس قازاقستان وبلىستارىندا جاسالعانى بەلگىلى بولدى. سول قايعىلى كۇندەرى قىلمىسكەرلەر اسكەريلەرگە شابۋىل جاساپ، جولدىڭ ءجۇرۋ بولىگىن جاۋىپ، اۆتوكولىكتەردى ورتتەپ، ازاماتتاردى تارتىپسىزدىكتەرگە قاتىسۋعا كوندىرگەن جانە نىسانداردى توناعان»، - دەدى ە. قيلىمجانوۆ ورتالىق كووممۋنيكاتسيالار قىزمەتىندە.
سونىمەن قاتار ول قوعامدىق قاۋىپسىزدىك پەن قۇقىقتىق ءتارتىپتى قامتاماسىز ەتۋدى بۇعاتتاۋ ءۇشىن ولار پوليتسيا ورگاندارىنىڭ عيماراتتارىنا شابۋىل جاساعانىن ەسكە سالدى.
«قازىرگى كەزدە ارنايى پروكۋرورلاردىڭ ءىس جۇرگىزۋىندە جاپپاي تارتىپسىزدىكتەر بويىنشا 53 جانە تەرروريزم اكتىلەرىنە قاتىستى 32 قىلمىستىق ءىس بار. تەرگەۋ ارەكەتتەرىنىڭ اياقتالۋىنا قاراي ىستەر سوتقا جولدانىپ جاتىر»، - دەدى باس پروكۋراتۋرا وكىلى.
