زەينەت جاسىنداعى ازاماتتارعا زەينەتاقى جيناعىنىڭ 50 پايىزىن بىردەن الۋعا مۇمكىندىك بەرىلەدى - نۇرىمبەتوۆ
بۇل تۋرالى بۇگىن ۇكىمەت ۇيىندەگى باسپا ءسوز ءماسليحاتىندا ق ر ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ ايتتى، دەپ حابارلايدى قازاقپارات ءتىلشىسى.
«زەينەتاقى جيناعىمىزدىڭ ءبىر بولىگىن تۇرعىن ءۇي نەمەسە باسقا قاجەتتىلىككە پايدالانۋ جونىندەگى تاپسىرماعا قاتىستى ۇكىمەتتە توپ جۇمىس ىستەدى. جۇمىس توبىنىڭ باسىم پىكىرلەرىن ۇكىمەت جانىنداعى ەكونوميكالىق ساياسات جونىندەگى كەڭەستە قاراپ، تۇجىرىمدامالىق ۇسىنىستار بەرىلدى. پرەزيدەنت اكىمشىلىگى ونى قاراپ، مەملەكەت باسشىسىنا ۇسىندى. پرەزيدەنت جالپى ۇسىنىستاردى قولداپ، ونى ىسكە اسىرۋ جونىندەگى تەتىكتەرىن ارى قاراي پىسىقتاۋ تاپسىرماسىن بەردى»، - دەدى ول.
وسى رەتتە مينيستر زەينەتاقى جيناعىنىڭ ءبىر بولىگىن پايدالانۋعا قاتىستى قانداي ۇسىنىستار بولعانىن تارقاتا ايتىپ بەردى.
«ءبىرىنشى، جۇمىس ىستەپ جۇرگەن ازاماتتار وزدەرىنىڭ جيناقتالعان جارنالارىنان ەڭ تومەنگى، جەتكىلىكتى شەكتەن اساتىن سوماسىن الۋىنا بولادى. ال جەتكىلىكتى شەك دەگەنىمىز نە؟ جەتكىلىكتى شەك دەگەنىمىز ءار ازاماتتىڭ جيناقتاۋشى زەينەتاقى قورداعى جيناعىنىڭ كەم دەگەندە ءومىر بويى ەڭ تومەنگى زەينەتاقى مولشەرىن الۋعا جەتكىلىكتى سوما. ول ەسەپتەلىنەتىن سوما، ەشكىم بەلگىلەمەيدى. ەكىنشىسى - زەينەت جاسىنا جەتكەندەرگە قاتىستى. قازىرگى ۋاقىتتا جيناقتاۋشى قورىندا اقشالارى بار ازاماتتار زاڭعا سايكەس ونى اي سايىن عانا الادى. ال ءبىزدىڭ ۇسىنىسىمىز ول جيناقتالعان سوماسىنىڭ 50 پايىزىنا دەيىن الا بەرسە دەيمىز. ءبىر عانا شارتى بار. ول ازاماتتىڭ جيناقتاۋشى زەينەتاقى قورداعى قالعان اقشاسى جانە مەملەكەت تاراپىنان الاتىن بازالىق زەينەتاقىسى مەن ەڭبەك زەينەتاقىسى قوسقان كەزدە تابىسىنىڭ 40 پايىزىنان تومەن بولماۋى كەرەك»، - دەدى ءبىرجان نۇرىمبەتوۆ.
