ەلباسى: قازاقستاندا امەريكا كاپيتالىنىڭ قاتىسۋىمەن 500 دەن استام كومپانيا جۇمىس ىستەپ جاتىر
مەملەكەت باسشىسى ەكىجاقتى كەزدەسۋ بارىسىندا ا ق ش ەنەرگەتيكا ءمينيسترىنىڭ ورىنباسارىنا حالىقارالىق «ەكسپو-2017» مامانداندىرىلعان كورمەسىنە قاتىسقانى ءۇشىن ريزاشىلىق ءبىلدىردى.
نۇرسۇلتان نازاربايەۆ ديپلوماتيالىق بايلانىستارىمىز ورناعان 25 جىل ىشىندە ەكى ەل اراسىندا سەنىمدى ىنتىماقتاستىق قالىپتاسقانىن ايتتى.
- ءبىز بيىل ديپلوماتيالىق قارىم-قاتىناسىمىزدىڭ 25 جىلدىعىن اتاپ وتەمىز. وسىناۋ جىلدار ىشىندە قازاقستان ا ق ش- پەن سەنىمدى سەرىكتەستىك ورناتتى، بۇل قارىم-قاتىناسقا ەشقانداي كولەڭكە تۇسكەن ەمەس. وسى ۋاقىتتا ەنەرگەتيكا جانە دەموكراتيالىق ارىپتەستىك سالالارىنداعى كەلىسىمدەرگە قول قويىلدى. ءبىز يادرولىق قارۋعا قارسى كۇرەس جۇرگىزۋ ماسەلەسىن بىرلەسە شەشىپ وتىردىق. حالىقارالىق كۇن تارتىبىندەگى بارلىق ماسەلە بويىنشا قازاقستان مەن ءسىزدىڭ ەلدەرىڭىزدىڭ ۇستانىمى بىردەي بولدى، - دەدى مەملەكەت باسشىسى.
نۇرسۇلتان نازاربايەۆ قازاقستان مەن ا ق ش اراسىنداعى ەكونوميكالىق قارىم-قاتىناستاردىڭ ناتيجەلەرىنە ەرەكشە توقتالىپ، ونى ءارى قاراي دامىتۋعا نيەتتى ەكەنىمىزدى اتاپ ءوتتى.
قازاقستاندا امەريكا كاپيتالىنىڭ قاتىسۋىمەن 500 دەن استام كومپانيا جۇمىس ىستەپ جاتىر. ولاردىڭ قاتارىندا ەلىمىزدىڭ ەكونوميكاسىنا 40 ميلليارد ا ق ش دوللارىن قۇيعان ءىرى مۇناي كومپانيالارى بار. ءبىز ىنتىماقتاستىعىمىزدى ودان ءارى دامىتۋعا ءازىرمىز، - دەدى قازاقستان پرەزيدەنتى.
د. برۋيللەتت ا ق ش پرەزيدەنتى د. ترامپتىڭ اتىنان نۇرسۇلتان نازاربايەۆتى جانە بارشا قازاقستاندىقتاردى «ەكسپو-2017» حالىقارالىق كورمەسىنىڭ وتۋىمەن قۇتتىقتادى.
- ءبىز ەكىجاقتى قارىم-قاتىناسىمىزدى ەنەرگەتيكا سەكتورىندا عانا ەمەس، سونداي-اق باسقا سالالاردا دا جالعاستىرۋعا دايىنبىز. مەن بۇگىن قازاقستاننىڭ ءبىرقاتار مەملەكەتتىك ورگاندارىنىڭ جەتەكشىلەرىمەن، سونىڭ ىشىندە ەلدەرىڭىزدىڭ ەنەرگەتيكا مينيسترىمەن كەزدەستىم. سونىمەن قاتار، ۆاشينگتون قازاقستاننىڭ دۇنيەجۇزىلىك ساۋدا ۇيىمى مەن ەكونوميكالىق ىنتىماقتاستىق جانە دامۋ ۇيىمىنا مۇشە بولۋىنا قولداۋ كورسەتۋگە نيەتتى ەكەنىن جەتكىزەمىن، - دەدى ا ق ش ەنەرگەتيكا ءمينيسترىنىڭ ورىنباسارى.
بۇدان بولەك، د. برۋيللەتت قازاقستاندا شەتەل بيزنەسمەندەرىنە قولايلى جاعداي جاسالعانى، سونىڭ ىشىندە ينۆەستورلارعا ارنالعان ۆيزالىق رەجىمگە وزگەرىس ەنگىزىلگەنى ءۇشىن مەملەكەت باسشىسىنا العىس ايتتى.
