مەملەكەتتىك بيۋدجەتكە 5,8 تريلليون كىرىس ءتۇستى
«11 ايداعى مەملەكەتتىك بيۋدجەتتىڭ اتقارىلۋى بيۋدجەتتىڭ بارلىق دەڭگەيلەرىندەگى كىرىستەر ءوسىمىنىڭ جوعارى قارقىنىمەن بەلگىلەندى. قازىردىڭ وزىندە مەملەكەتتىك بيۋدجەتكە وتكەن جىلدىڭ جىلدىق كولەمىنىڭ دەڭگەيىندە كىرىستەر ءتۇستى. مەملەكەتتىك بيۋدجەت شىعىستارىنىڭ سوماسى وتكەن جىلدىڭ وسىنداي كەزەڭىمەن سالىستىرعاندا 1,5 تريلليون تەڭگەگە ارتىق تولەندى. قارجى مينيسترلىگى مەملەكەتتىك ورگاندارمەن بىرلەسىپ، اعىمداعى جىلدىڭ قىركۇيەك ايىنان باستاپ ناقتىلانعان بيۋدجەتتىڭ ءىس- شارالارىن ورىنداۋ مونيتورينگىسى جۇمىسىن اتقاردى. اپتا سايىن بيۋدجەت قاراجاتىن يگەرۋ ماسەلەلەرى جونىندە مەملەكەتتىك ورگاندارمەن سەلەكتورلىق كەڭەستەر وتكىزىلدى. وسى ءىس- شارالاردىڭ ارقاسىندا وتكەن جىلدىڭ كورسەتكىشتەرىمەن سالىستىرعاندا يگەرۋ قارقىنى اناعۇرلىم جاقسى»، - دەپ اتاپ ءوتتى مينيستر.
ونىڭ دەرەكتەرىنە سايكەس، مەملەكەتتىك بيۋدجەتكە 5,8 تريلليون تەڭگە سوماسىندا كىرىستەر (ترانسفەرتتەردى قوسپاعاندا) ءتۇستى. مەملەكەتتىك بيۋدجەت بويىنشا اسىرا ورىنداۋ سوماسى 396 ميلليارد تەڭگەنى، رەسپۋبليكالىق بيۋدجەت بويىنشا 255 ميلليارد تەڭگەنى جانە جەرگىلىكتى بيۋدجەت بويىنشا 141 ميلليارد تەڭگەنى قۇرادى.
«اعىمداعى جىلدىڭ 11-ايىندا وتكەن جىلدىڭ ءدال وسى كەزەڭىنە قاراعاندا مەملەكەتتىك بيۋدجەتتىڭ كىرىستەرى 31,8 (1 398 ميلليارد تەڭگەگە)، رەسپۋبليكالىق بيۋدجەتتىڭ كىرىستەرى 41,1 (1 195 ميلليارد تەڭگەگە) جانە جەرگىلىكتى بيۋدجەتتىڭ كىرىستەرى 13,6 پايىزعا (203 ميلليارد تەڭگەگە) ءوستى. تۇتاستاي العاندا مەملەكەتتىك بيۋدجەتتىڭ كىرىستەرى 107,3، رەسپۋبليكالىق بيۋدجەتتىكى 106,6 جانە جەرگىلىكتى بيۋدجەتتىكى 109,1 پايىزعا اتقارىلدى»، - دەدى سۇلتانوۆ.
ءمينيستردىڭ سوزىنە قاراعاندا، جىلدىڭ قورىتىندىسى بويىنشا شامامەن 250-300 ميلليارد تەڭگەگە سالىق تۇسىمدەرىن ايتارلىقتاي اسىرا ورىنداۋ كۇتىلۋدە.
«مۇنىڭ ءوزى بىزگە ۇلتتىق قوردان كەپىلدەندىرىلگەن ترانسفەرتتى تارتپاۋعا مۇمكىندىك بەرەدى. سوندىقتان دا، كىرىستەر 100 پايىزدان شامالى عانا كوبىرەك اتقارىلاتىن بولادى»، دەدى ول.
اۆتور: مارلان جيەمباي
