ەل ەكونوميكاسىنىڭ ءوسىمى 4 پايىزدان استى - ەلباسى
«جالپى 2018 -جىلدىڭ كورسەتكىشتەرى ەكونوميكانىڭ بارلىق سالاسىندا جاقسى دەپ ايتۋعا بولادى. سونىڭ ارقاسىندا حالىققا الەۋمەتتىك قىزمەت كورسەتەتىندەي جاعداي بولدى. اتاپ ايتساق، ەكونوميكانىڭ ءوسىمى 4 پايىزدان استى. بۇل جالپى دۇنيەجۇزىلىك ورتاشا وسىمنەن جوعارى. نەگىزىنەن ساۋدادا 7،6، كولىكتە 4،5، ونەركاسىپتە 4 پايىزدان استام ءوسىم بار»، - دەدى نۇرسۇلتان نازاربايەۆ
ەلباسى ەل ەكونوميكاسىنىڭ باسقا دا سالالارىندا جاقسى قارقىن بايقالاتىندىعىن اتاپ ءوتتى.
«ينفلياتسيانىڭ وتكەن جىلعى كورسەتكىشى 5,3 پايىزدى قۇرادى. سولاي دەپ جوسپارلانعان ەدىك. نەگىزگى كاپيتالعا سالىنعان ينۆەستيتسيالار 17 پايىزدان استى. بۇل دا جاقسى كورسەتكىش دەپ ايتۋعا بولادى. اتالعان ەكونوميكالىق كورسەتكىشتەردىڭ بارلىعى حالىق تۇرمىسىن جاقسارىپ، ناقتى تابىسىنىڭ ارتۋىنا ءوزىنىڭ ۇلەسىن تيگىزەدى»، - دەدى نۇرسۇلتان نازاربايەۆ.
مەملەكەت باسشىسى كەشە 5 وبلىس اكىمىمەن كەزدەسكەنىن ەسكە سالىپ ءوتتى.
«ەسەپتەرىن تىڭدادىق. وڭىرلەردە دە ىستەلىپ جاتقان شارۋا از ەمەس. بارلىعى ءبىزدىڭ باعدارلامالاردى ورىنداۋ ءۇشىن اتسالىسىپ، جۇمىس ىستەپ جاتىر»، - دەدى ەلباسى.
اۆتور: مارلان جيەمباي