ارنايى ەكونوميكالىق ايماقتار مەرزىمىن 49 جىلعا دەيىن ۇزارتۋ قاجەت - مينيستر
بۇل تۋرالى ۇكىمەت وتىرىسىندا ق ر يندۋستريا جانە ينفراقۇرىلىمدىق دامۋى ءمينيسترى بەيبىت اتامقۇلوۆ ايتتى، دەپ حابارلايدى قازاقپارات ءتىلشىسى.
«مەملەكەت باسشىسى ارنايى ەكونوميكالىق ايماقتار قىزمەتىنىڭ تيىمدىلىگى تومەندىگىن جانە جوبالاردىڭ ءالسىز تولىقتىرىلۋى بايقالاتىنىن اتاپ ءوتتى. مىسالى، حيمپارك- تاراز اۋماعىندا قۇرىلعان ساتتەن باستاپ بارلىعى 1 جوبا ىسكە قوسىلعان، قورعاس-شىعىس قاقپاسى مەن «قورعاس» حالىقارالىق شەكارالىق ىنتىماقتاستىق ورتالىعىندا دا جاعداي وسىنداي. ءبىز ءاربىر ارنايى ەكونوميكالىق ايماق بويىنشا تالداۋ جۇرگىزدىك. دامىعان ەلدەردىڭ تاجىريبەسىن زەردەلەپ، مىناداي جاڭا تاسىلدەردى ۇسىنامىز. ءبىرىنشى. الەمدەگى تابىستى ارنايى ەكونوميكالىق ايماقتاردىڭ تاجىريبەسىن قاراي وتىرىپ، جۇمىس ىستەۋ مەرزىمىن 49 جىلعا دەيىن ۇزارتۋدى ءجون دەپ سانايمىز.
ەكىنشى. ارنايى ەكونوميكالىق ايماقتاردىڭ اۋماقتارىنداعى قىزمەت تۇرلەرىنىڭ باسىمدىعىن الىپ تاستاۋ جانە وڭدەۋشى ونەركاسىپتىڭ بارلىق سالالارى مەن سەكتورلارى ءۇشىن قولجەتىمدىلىكتى قامتاماسىز ەتۋ»، - دەدى مينيستر.
ونىڭ اتاپ وتۋىنشە، ۇشىنشىدەن، ءاربىر ينۆەستور ءۇشىن جەڭىلدىكتى توپتامانىڭ ينۆەستيتسيالار كولەمى بويىنشا ولشەمدەرگە سايكەستىگىنە بايلانىستى ءتۇرلى قولدانىلۋ مەرزىمدەرىن ۇسىنۋ قاجەت.
تورتىنشىدەن، جاۋاپكەرشىلىك قاراستىرىلادى. ياعني، مىندەتتەمەلەر ورىندالماعان جاعدايدا، بيزنەس ءتيىستى كەزەڭ ءۇشىن بارلىق جەتە ەسەپتەلمەگەن سالىقتاردى قايتارۋى ءتيىس.
«بەسىنشى، ارنايى ەكونوميكالىق ايماقتاردىڭ اۋماقتارىندا جوبالاردى ىسكە اسىرۋ ءۇشىن دايىن وندىرىستىك ءۇي-جايلاردى ۇسىنۋ مۇمكىندىگىن قاراستىرۋدى ۇسىنامىز»، - دەدى بەيبىت اتامقۇلوۆ.