وتباسىنداعى جانجالشىلاردى قاماۋ مەرزىمىن 48 ساعاتقا دەيىن ارتتىرۋ كەرەك - باس پروكۋرور
باس پروكۋروردىڭ سوزىنە قاراعاندا، قازىرگى كۇنى تۇرمىستىق زورلىق- زومبىلىققا قاتىستى تۇرعىنداردىڭ سانا- سەزىمىن وزگەرتۋدىڭ جاڭا جولدارىن ىزدەستىرۋ، پروبلەماعا قاتىستى كوزقاراستى وزگەرتۋ اسا ماڭىزدى.
«سوڭعى جىلدارى ەلىمىزدە وسى سالاداعى زاڭدىلىقتى نىعايتۋ بويىنشا زاڭنامالىق جانە پراكتيكالىق شارالار قابىلداندى. تۇرمىستىق زورلىق- زومبىلىق پروفيلاكتيكاسى تۋرالى زاڭ زورلىق- زومبىلىق قۇرباندارىن قورعاۋدى جانە وتباسىلىق جانجالشىلارعا قاتىستى قىلمىستىق- پروتسەستىك ماجبۇرلەۋدى قامتاماسىز ەتۋ مۇمكىندىكتەرىن ەداۋىر كەڭەيتتى. سونىڭ ارقاسىندا وتباسىلىق- تۇرمىستىق سالاداعى قىلمىستاردىڭ ازايۋ ديناميكاسىنا قول جەتكىزۋ مۇمكىن بولدى. الايدا بۇل پروبلەما ءالى دە وزەكتىلىگىن جوعالتقان جوق. تۇرمىستىق زورلىق- زومبىلىق سول كۇيىندە ماڭىزدى الەۋمەتتىك پروبلەما بولىپ قالىپ وتىر»، - دەدى ج. اسانوۆ.
ونىڭ ايتۋىنشا، كوپتەگەن قۇقىق بۇزۋشىلار جازادان قۇتىلسا، زورلىق-زومبىلىق فاكتىلەرى ايتىلماعان كۇيىندە تىركەلمەي قالىپ جاتىر. سونىمەن قاتار، رەسمي ستاتيستيكا جابىرلەنۋشىلەردىڭ پوليتسياعا شاعىمدانۋىنا كەدەرگى كەلتىرەتىن كوپتەگەن فاكتورلار سالدارىنان جاعدايدىڭ ناقتى سيپاتىن كورسەتپەيدى.
«سوندىقتان دا، قازىرگى كۇنى وتباسىنداعى زورلىق- زومبىلىق فاكتىلەرىنىڭ الدىن الۋدىڭ مۇلدەم جاڭا جولدارىن ىزدەستىرۋ ماڭىزدى. وسىنداي ارەكەتتەردىڭ الدىن الۋدا الەۋمەتتىك- قۇقىقتىق شارالارعا باسىمدىق بەرۋ كەرەك»، - دەيدى باس پروكۋرور.
ونىڭ سوزىنە قاراعاندا، تۇرمىستىق زورلىق- زومبىلىقپەن ءتيىمدى كۇرەسۋدىڭ نەگىزگى شارتى - قوعامنىڭ پاراديگماسىن وزگەرتۋ. «ول ءۇشىن قوعامدىق سانا مەن قالىپتاسقان ستەرەوتيپتەردى تۇبەگەيلى وزگەرتىپ، وتباسىنداعى زورلىق- زومبىلىقتىڭ سالدارىنا سايكەس تۇسىنىك قالىپتاستىرۋ قاجەت، قوعامعا قارسى مىنەز- قۇلىقتى ەركىمەن جىبەرمەۋ كەرەك. ءاربىر جازاسىز قالعان ءۇي بۇزاقىسى ءوزىنىڭ بويىندا بۇدان دا اۋىر قۇقىق بۇزۋشىلىقتاردى جاساۋعا نەگىز بولاتىن جاۋاپكەرشىلىكسىزدىك سەزىمىن دامىتادى»، - دەي كەلە، باس پروكۋرور تۇرمىستىق زورلىق- زومبىلىقتىڭ الدىن الۋ تەتىكتەرىن جەتىلدىرۋگە باعىتتالعان زاڭنامالىق ۇسىنىستاردى العا تارتتى.
«مىسالى، ۇرىپ- سوعۋ مەن دەنساۋلىققا جەڭىل زيان كەلتىرۋدى اكىمشىلىك قۇقىق بۇزۋشىلىقتار قاتارىنا قايتارۋ كەرەك. تۇرمىستىق، وتباسىلىق جانجالشىلاردى ۇستاۋ مەرزىمىن 3 تەن 48 ساعاتقا دەيىن ارتتىرىپ، قورعاۋ نۇسقاماسىنىڭ مەرزىمىن 90 تاۋلىككە دەيىن ۇزارتۋدى ۇسىنامىز. جۇمىستىڭ ءساتتى جۇرۋىنە مەملەكەت پەن ازاماتتىق قوعام ينستيتۋتتارىنىڭ بىرىككەن كۇشىنىڭ نىعايۋى سەپتىگىن تيگىزەدى، اسىرەسە وتباسىنداعى زورلىق- زومبىلىق پروبلەمالارىن پراكتيكالىق تۇرعىدا شەشۋمەن اينالىساتىن ۇكىمەتتىك ەمەس ۇيىمدارمەن ارەكەتتەستىكتىڭ زور ىقپالى بار»، - دەدى ج. اسانوۆ.
اۆتور: قانات مامەتقازى ۇلى