12:54, 16 - مامىر 2023 | GMT +6
جىل باسىنان بەرى 46 ميلليارد تەڭگەگە قارجىلىق بۇزۋشىلىق فاكتىلەرى انىقتالدى
استانا. قازاقپارات - بيىل 4 ايدا 46 ميلليارد تەڭگەگە قارجىلىق بۇزۋشىلىقتار انىقتالدى. بۇل تۋرالى ۇكىمەت وتىرىسىندا پرەمەر- ءمينيستردىڭ ورىنباسارى-قارجى ءمينيسترى ەرۇلان جاماۋبايەۆ ايتتى، دەپ حابارلايدى قازاقپارات ءتىلشىسى.
«وسى جىلدىڭ 4 ايىندا كامەرالدىق باقىلاۋمەن 5 تريلليون تەڭگە سوماعا جۋىق 175 مىڭ مەملەكەتتىك ساتىپ الۋ ءراسىمى قامتىلدى. تەكسەرۋ قورىتىندىسى بويىنشا 26836 ءراسىم بۇزۋشىلىق انىقتالدى. ونىڭ ىشىندە ولاردى جويۋ تۋرالى حابارلامالاردىڭ 90 پايىزىن مەملەكەتتىك اۋديت وبەكتىلەرى ورىندادى»، - دەدى ول.
قارجى ءمينيسترىنىڭ دەرەگىنشە، 684 اۋديتورلىق ءىس- شارا وتكىزىلدى. شامامەن 303 ميلليارد تەڭگە بيۋدجەت قاراجاتىنا اۋديت جاسالدى.
«سوماسى 46 ميلليارد تەڭگەگە قارجىلىق بۇزۋشىلىقتار انىقتالدى. تاۋارلاردى جەتكىزۋ، قىزمەتتەردى كورسەتۋ مەن جۇمىستاردى ورىنداۋ، بيۋدجەتكە وتەۋ جانە ەسەپكە الۋ جولىمەن 31 ميلليارد تەڭگەگە بۇزۋشىلىقتار جويىلدى. اۋديت وبەكتىلەرى قىزمەتىن جەتىلدىرۋ جانە تيىمدىلىگىن ارتتىرۋ ءۇشىن 692 ۇسىنىم بەرىلدى»، - دەدى ەرۇلان جاماۋبايەۆ.