قازاقستاننىڭ اۋە كەڭىستىگى ارقىلى قاتىنايتىن رەيستەر سانى 450 دەن استى
«قازاەروناۆيگاتسيا» ر م ك قازاقستاننىڭ باتىس وبلىستارى ارقىلى ترانزيتتىك رەيستەردىڭ كۇرت وسۋىنە بايلانىستى اۋە قوزعالىسىن باسقارۋ جۇيەسىنىڭ وتكىزۋ قابىلەتىن ارتتىرۋ بويىنشا ۋاقتىلى شارالار قابىلدانعانىن حابارلايدى. اعىمداعى تاۋلىكتە قازاقستاننىڭ اۋە كەڭىستىگىندەگى رەيستەردىڭ جالپى سانى ءۇش ەسەدەن استام ۇلعايدى. بۇل 450-دەن استام رەيس دەگەن ءسوز. اۋە كەڭىستىگىن باسقارۋ جۇيەسى شتاتتىق رەجيمدە جۇمىس ىستەپ تۇر جانە قازىرگى جۇكتەمەلەردى كەدەرگىسىز ورىنداۋعا مۇمكىندىك بار.
«قازاەروناۆيگاتسيا» ر م ك ديسپەتچەرلىك قۇرامى جۇمىس كولەمىن ۇلعايتۋعا دايىن»، - دەپ جازادى ق ر يندۋستريا جانە ينفراقۇرىلىمدىق دامۋ مينيسترلىگى ازاماتتىق ايۆاتسيا كوميتەتىنىڭ باسپا ءسوز قىزمەتى.
«قازاەروناۆيگاتسيا» ماماندارى جۇكتەمەنىڭ ارتۋى كورسەتىلەتىن قىزمەتتىڭ ساپاسىنا كەرى اسەر ەتپەيتىنىنە سەنىم ءبىلدىردى.
«بارلىق رەيستەرگە ۋاقتىلى جانە ساپالى قىزمەت كورسەتىلەتىنىن مالىمدەيمىز. ءبىزدىڭ باستى مىندەتىمىز - قاۋىپسىز جانە ۇزدىكسىز اۋە قوزعالىسىن قامتاماسىز ەتۋ»، - دەپ جازىلعان مالىمەتتە.
بۇعان دەيىن سوڭعى تاۋلىكتە ەلدىڭ اۋە كەڭىستىگى ارقىلى بۇرىن جوسپارلانباعان 257 رەيس ورىندالدعانىن جازعانبىز.
اۆتور: ەسىمجان ناقتىباي
