مينيستر كەي ازاماتتىڭ 42500 تەڭگەنى ەكىنشى رەت نەگە الا الماي وتىرعانىن ءتۇسىندىردى

نۇر-سۇلتان. قازاقپارات - ەڭبەك جانە حالىقتى الەۋمەتتىك قورعاۋ ءمينيسترى ءبىرجان نۇرىمبەتوۆ نەلىكتەن كەي قازاقستاندىقتىڭ 42500 تەڭگە كولەمىندەگى الەۋمەتتىك تولەمدى ەكىنشى رەت الا الماي وتىرعانىن ءتۇسىندىردى، - دەپ حابارلايدى Tengrinews.kz ءتىلشىسى.

ءمينيستردىڭ ايتۋىنشا، بۇگىندە تولەمدى 4 ميلليون 539 مىڭ ادام العان. بۇل باعىتقا بيۋجەتتەن 193 ميلليارد تەڭگە بولىنگەن.

«توتەنشە جاعداي رەجيمىنىڭ العاشقى ايىندا، ياعني 16- ساۋىرگە دەيىن 3 ميلليون 735 مىڭ ادام تولەم الدى. بۇل ادامدار تولەمدى ەكىنشى رەت الۋعا قۇقىلى. ءبىز مامىر ايىنىڭ باسىنان باستاپ تولەمدى جۇرگىزە باستادىق. دەمالىس كۇندەرىنىڭ الدىندا 5-6- مامىردا ەكى ميلليوننان استام تۇلعاعا تولەۋ ءۇشىن شەشىم شىعارىلدى. ءبىز بانكتەرگە 99 ميلليارد تەڭگە بولدىك»، - دەدى مينيستر ۇكىمەت ۇيىندە وتكەن ونلاين-بريفينگتە.

«كەي ازامات الەۋمەتتىك تولەمدى الىپ ۇلگەردى. الايدا دەمالىس كۇندەرى بانكتەر جۇمىس ىستەمەدى، ءبىراق بۇگىننەن باستاپ ازاماتتار 42500 تەڭگەنى الىپ جاتىر. بۇل تولەمدەر الۋى ءتيىس باسقا ادامدارعا دا تاعايىندالادى»، - دەدى نۇرىمبەتوۆ.

بۇعان دەيىن مينيستر قازاقستاندا 11- مامىردان باستاپ 42500 تەڭگە تولەماقىسىن بەرۋگە ءوتىنىش قابىلداۋ توقتاتىلعانىن اتاپ وتكەن بولاتىن. 11- مامىرعا دەيىن تۇسكەن وتىنىشتەردى ەڭبەك مينيسترلىگى قاراستىرادى جانە وڭ شەشىم شىعارىلسا، تولەم جۇرگىزىلەدى.