قازاقستاننان 41 قۇتقارۋشى تۇركياعا كومەككە اتتاندى
بۇل تۋرالى ق ر توتەنشە جاعدايلار جونىندەگى ءبىرىنشى ۆيتسە-ءمينيسترى يبراگيم قۇلشىمبايەۆ ايتىپ بەردى، دەپ حابارلايدى قازاقپارات ءتىلشىسى.
«وزدەرىڭىز بىلەتىندەي، بۇگىن تاڭەرتەڭ تۇركيا رەسپۋبليكاسىنىڭ ورتالىق بولىگىندە ءبىرقاتار جەر سىلكىنىسى بولدى. مەملەكەت باسشىسى قاسىم-جومارت توقايەۆ قازاقستاننىڭ كومەك كورسەتۋگە دايىن ەكەنىن مالىمدەدى. قازىر ت ج مينيسترلىگىنىڭ قۇتقارۋشىلارى «بۇركىت» اۋە كومپانياسىنىڭ ۇشاعىنا ءمىنىپ، استانادان الماتىعا بارادى. الماتىدا مينيسترلىكتىڭ كۇش-قۇرالى تولىعىمەن تۇركياعا اتتانادى»، - دەدى يبراگيم قۇلشىمبايەۆ «جىبەك جولى» تەلەارناسىنىڭ تىكەلەي ەفيرىندە.
سپيكەردىڭ ايتۋىنشا، تۇركياعا رەسپۋبليكالىق جەدەل قۇتقارۋ جاساعىنىڭ قۇتقارۋشىلارى بارا جاتىر، ولاردىڭ كوپشىلىگىندە حالىقارالىق قۇتقارۋشى ساناتى بار. سونداي-اق، «اپات مەديتسيناسى» ورتالىعىنىڭ مەديتسينا قىزمەتكەرلەرىن قوسقاندا، جالپى 41 ادام تۇركياعا ۇشادى.
«وزىمىزبەن بىرگە اپاتتىق-قۇتقارۋ اۆتوكولىكتەرىن، مەديتسينالىق جابدىقتاردى، پنيەۆمو-مودۋلدىك شاتىرلار، گيدراۆليكالىق قۇتقارۋ قۇرالدارىن الدىق. وعان قوسا، ق ر توتەنشە جاعدايلار مينيسترلىگىنىڭ ارنايى كينولوگيالىق توبى قىزمەتتىك يتتەردى الىپ بارادى. تۇركياعا جەتكەن سوڭ تاعى دا بايلانىسقا شىعىپ، جاعدايدى باياندايمىز»، - دەدى ءبىرىنشى ۆيتسە-مينيستر.
ايتا كەتەيىك، تۇركيانىڭ وڭتۇستىك-شىعىسىنداعى كاحرامانماراش پروۆينتسياسىندا ءزىلزالا قۇرباندارىنىڭ سانى مىڭنان استى، كەمىندە 7 مىڭ ادام جاراقات الدى.
سوڭعى دەرەكتەر بويىنشا، كاحرامانماراش، كيليس، ديارباكىر، ادانا، وسمانيە، گازيانتەپ، شانلىۋرفا، اديامان، مالاتيا جانە حاتاي پروۆينتسيالارىندا 2824 عيمارات قيراعان.
پرەزيدەنت قاسىم-جومارت توقايەۆ تۇركيا پرەزيدەنتى رەجەپ تايپ ەردوعانمەن تەلەفون ارقىلى سويلەسىپ، قايعىرا كوڭىل ايتتى.
پرەزيدەنت تۇركيانىڭ زارداپ شەككەن اۋداندارىنداعى ىزدەستىرۋ-قۇتقارۋ جۇمىستارىنا كومەكتەسۋ ءۇشىن قازاقستان شۇعىل تۇردە قۇتقارۋشىلار مەن دارىگەرلەر جىبەرەتىنىن، سونداي-اق باۋىرلاس ەلگە گۋمانيتارلىق كومەك كورسەتۋگە دايىن ەكەنىن جەتكىزدى.