ەلباسى: پارلامەنت پەن ۇكىمەتكە پرەزيدەنتتىڭ 40 تان استام قۇزىرەتى وتەدى - كەسكىن
«الداعى رەفورما ءبىزدىڭ دامۋدىڭ جانە جالپى قازىرگى زامانعى دامۋ لوگيكاسىنا سۇيەنە وتىرىپ جاسالدى. نەگىزگى ءمانى - پرەزيدەنت ءوزىنىڭ ءبىرقاتار قۇزىرىن پارلامەنت پەن ۇكىمەتكە بەرەدى. مىقتى پرەزيدەنتتىك بيلىك مەملەكەتتىڭ قالىپتاسۋ كەزەڭىندە اۋىر بەلەستەردى وتكەرۋ ءۇشىن اسا قاجەت بولدى. ول ءوز ۋاقىتىندا ءوزىن- ءوزى اقتادى. ءبىزدىڭ بارلىق جەتىستىكتەر وسى جۇيەنىڭ نەگىزىندە كەلدى»، - دەدى ەلباسى قازاقستان حالقىنا ارنالعان ۇندەۋىندە.
پرەزيدەنتتىڭ ايتۋىنشا، بۇل رەفورما باسقارۋ جۇيەسىنىڭ تيىمدىلىگىن جوعارىلاتۋعا باعىتتالعان.
«ءبىز جاڭا مەملەكەت، جاڭا ەكونوميكا، جاڭا قوعام قۇردىق. ءبىزدىڭ تاڭداعان جولىمىزدىڭ دۇرىستىعىن تاريحتىڭ ءوزى دالەلدەپ بەردى. تاۋەلسىزدىگىمىزدىڭ 25 جىلدىعىن اتاپ ءوتۋ كەزىندە، ءبىز ەلدىڭ جەتىستىگىن، سونىڭ ىشىندە بيلىك قۇرىلىمدارىنىڭ، پرەزيدەنتتىك جۇيەنىڭ جەتىستىگىن ءسوز ەتتىك. دەگەنمەن الەم قازىر كوز الدىمىزدا وزگەرىپ جاتىر. قوعامدىق پروتسەستەردىڭ جىلدامدىعى مەن قيىندىعى قازاقستاندا دا ۇلعايۋدا. الدىمىزعا تاريحتىڭ ءوزى قوياتىن جاھاندىق جانە ايماقتىق قاۋىپ- قاتەرلەردى قالاي قابىلدايتىنىمىزدى وسى باستان ويلاۋىمىز كەرەك»، - دەدى ن. نازاربايەۆ.
ەلباسىنىڭ اتاپ كورسەتكەنىندەي، ۇسىنىلىپ وتىرعان رەفورمانىڭ نەگىزگى ءمانى بيلىك قۇزىرىن ۇلەستىرۋ، ساياسي جۇيەنى جالپى دەموكراتيالاندىرۋ.
«پرەزيدەنت ءۇشىن جاڭا جاعدايلاردا ستراتەگيالىق قۇزىر، بيلىك تارماقتارى اراسىنداعى جوعارعى ءاربيتردىڭ ءرولى باسىمدىق بولادى. مەملەكەت باسشىسى، سونداي- اق، سىرتقى ساياساتقا، ۇلتتىق قاۋىپسىزدىككە جانە ەلدىڭ قورعانىس قابىلەتىنە دەن قويادى. ءوز كەزەگىندە پارلامەنت پەن ۇكىمەتتىڭ ءرولى ارتادى. اتالمىش جۇمىس ەكى نەگىزگى باعىتتاردا جۇرگىزىلەدى. بىرىنشىدەن، الەۋمەتتىك- ەكونوميكالىق پروتسەستەرگە قاتىستى زاڭمەن بەكىتىلگەن پرەزيدەنت قۇزىرىن ۇكىمەتكە جانە وزگە دە اتقارۋشى ورگاندارعا بەرۋ. اتالمىش سالاعا تولىق جاۋاپكەرشىلىكتى ۇكىمەت، مينيسترلىكتەر مەن اكىمدىكتەر السىن. قۇزىردى بەرۋ ءتيىستى زاڭداردى وزگەرتۋ ارقىلى قول جەتكىزۋگە بولادى. پارلامەنتكە نەمەسە ۇكىمەتكە بەرۋگە بولاتىن 40 تان استام قۇزىرەت بار. بۇل وزگەرىستەردى ۇكىمەت باسىم تارتىپتە پارلامەنتكە سەسسيا سوڭىنا دەيىن ەنگىزۋى ءتيىس.
ەكىنشىدەن، بۇدان دا اۋىر مىندەت - بيلىك تارماقتارى اراسىنداعى قارىم- قاتىناستاردى كونستيتۋتسيالىق دەڭگەيدە تەپە- تەڭ ەتۋ»، - دەدى پرەزيدەنت.
ەلباسىنىڭ سوزىنشە، ۇكىمەت قۇرۋدا پارلامەنت ءرولىن، مينيسترلەردىڭ دەپۋتاتتار الدىنداعى جاۋاپكەرشىلىگىن كۇشەيتۋ اسا ماڭىزدى. پارلامەنتتىك سايلاۋدا جەڭىسكە جەتكەن پارتيا ۇكىمەت قۇرامىن جاساقتاۋدا شەشىمدى تۇردە اسەر ەتە الادى. وسىعان بايلانىستى، ەندى ۇكىمەت قۇزىرىن بۇرىنعىداي پرەزيدەنت الدىندا ەمەس، پارلامەنت الدىندا بوساتۋى زاڭدى بولادى.
اۆتور: جاسۇلان جولدىبايەۆ
