الماتىدا 3- اقپاننان باستاپ قىتايدان كەلەتىن رەيستەر توقتاتىلادى
بۇل تۋرالى الماتىدا وتكەن بريفينگ بارىسىندا قالالىق تاۋارلار مەن قىزمەتتەردىڭ ساپاسى مەن قاۋىپسىزدىگىن باقىلاۋ دەپارتامەنتىنىڭ باسشىسى ايزات مولداعاسىموۆا ءمالىم ەتتى، دەپ حابارلايدى قازاقپارات ءتىلشىسى.
قازىرگى تاڭدا الماتىدا كوروناۆيرۋس ينفەكتسياسىنىڭ الدىن الۋ جانە تارالۋىن بولدىرماۋ ماقساتىندا پروفيلاكتيكالىق شارالار لەگى جۇرگىزىلىپ جاتىر. 2020-جىلدىڭ 3- اقپانىنان باستاپ قىتايدان كەلەتىن بارلىق رەيستەر توقتاتىلادى. ق ح ر- دان كەلەتىن رەيستەردىڭ وقشاۋلىق قاعيداتى ساقتالادى. قىتايدان كەلەتىن اۋە كەمەلەرىنىڭ ءبارى جەكە تۇراققا ورنالاستىرىلىپ، جولاۋشىلار مەن ەكيپاج مۇشەلەرى اۋەجايدىڭ تەرمينالىمەن بايلانىسى جوق ارنايى اۋماقتان وتەدى.
«1- اقپاننان باستاپ بارلىق حالىقارالىق رەيس بويىنشا سانيتارلىق-كارانتيندىك باقىلاۋ كۇشەيتىلەدى. الەمنىڭ 26 ەلىندە كوروناۆيرۋس جۇقتىرۋدىڭ 160 جاعدايى تىركەلدى. بۇگىنگى تاڭدا بارلىق رەيس قاداعالانۋدا»، - دەدى ايزات مولداعاسىموۆا.
سانيتارلىق-كارانتيندىك باقىلاۋدى كۇشەيتۋگە 80 ەپيدەميولوگ پەن 8 بريگادا جۇمىلدىرىلعان. تاۋلىك بويى 30 ەپيدەميولوگ بارلىق رەيس بويىنشا جۇمىس جۇرگىزەدى.
«الماتى حالىقارالىق اۋەجايى رەسپۋبليكاداعى ەڭ ءىرى اۋەجايلاردىڭ ءبىرى. كۇنىنە مۇندا 50 رەيس ورىندالادى. ءبىر ۋاقىتتا 5 رەيستىڭ ورىندالاتىن كەزى دە بولادى. ءدال وسى رەيستەردە كوروناۆيرۋسكە كۇدىكتى ادامدارعا قاتىستى سانيتارلىق باقىلاۋ كۇشەيتىلگەن»، - دەدى ول.
ايتا كەتەرلىگى، اۋەجايعا كەلگەن ادامداردىڭ بارىنە بىردەن باقىلاۋ ورناتىلادى. اۋەجاي جاڭاشا تەحنولوگياداعى تەپلوۆيزورمەن قامتىلعان. بورتتا تەمپەراتۋرانى 2 دەن 3 مەترگە دەيىنگى قاشىقتىقتا جاناسپاي كورسەتەتىن بايلانىسسىز تەپلوۆيزور جۇمىس ىستەيدى. اۋەجايدا ستاتسيونارلىق جىلۋ تۇسىرگىشتەر بار. ولار تەحنيكالىق پارامەترلەر بويىنشا ۇزاق قاشىقتىقتا تەمپەراتۋرانى ولشەي الادى. سونىمەن قاتار، كوروناۆيرۋستىق ينفەكتسياعا كۇدىكتى ادامداردى تەكسەرۋ ءۇشىن جەكە جەلدەتۋ جۇيەسى بار ءسۇزۋ ايماقتارى قاراستىرىلعان.
«ۇشاقتا ولار تەك تەكسەرۋ جۇرگىزىپ قانا قويمايدى. سونىمەن قاتار ەپيدەميولوگيالىق تۇرعىدان قولايسىز ەلدەردەن كەلگەنى جايلى انامنەز جيناپ، ساۋالنامالار جۇرگىزىلەدى، بۇكىل رەيستەردە كەلگەندەردىڭ بارىنە مەديتسينالىق باقىلاۋ تولىق كولەمدە جۇرگىزىلەدى. د د س ۇ مالىمەتتەرى بويىنشا، انامنەز تەك قىتايدان كەلەتىن جولاۋشىلاردان عانا ەمەس، سونىمەن قاتار كوروناۆيرۋستىق ينفەكتسيالار تىركەلگەن ەلدەردەن كەلگەن باسقا دا جولاۋشىلاردان جيناقتالادى»، - دەپ ءتۇسىندىردى ايزات مولداعاسىموۆا.
سونىمەن قاتار، زەرتحانالىق زەرتتەۋلەر كاتارالدى قۇبىلىستاردىڭ بەلگىلەرى بولعان جاعدايدا عانا جۇرگىزىلۋى كەرەك.
«بارلىعىنا جالپى زەرتحانالىق دياگنوز قويۋدىڭ قاجەتى جوق. ستاتيستيكا كورسەتكەندەي، ادامداردىڭ 99,9 پايىزىندا جرۆي، ءارتۇرلى شتامدار، ال قالعاندارىندا ءارتۇرلى ساناتتاعى ۆيرۋستار (كوروناۆيرۋس ەمەس) انىقتالعان»، - دەپ اتاپ ءوتتى سپيكەر.
وسى جىلدىڭ 18- قاڭتارىنان باستاپ قىتايدان الماتىعا 4904 ادام كەلىپ، ولاردىڭ 90 پايىزى باقىلاۋعا الىنعان. اتالعان ازاماتتاردى مەديتسينالىق ۇيىمدارداعى دەرەكتەرىن تابۋ جانە تەكسەرۋ جۇمىستارى جۇرگىزىلۋدە.
ايزات مولداعاسيموۆا سونىمەن قاتار بارلىق كلينيكادا جۇقپالى اۋرۋلاردىڭ بەلگىلەرى بار ادامدارعا ارنالعان وقشاۋلاعىشتار اشىلاتىنىن ايتتى. بۇل شەشىم كوروناۆيرۋستىق ينفەكتسيانىڭ الدىن الۋ جانە ۋاقتىلى انىقتاۋ ءۇشىن قابىلدانعان.
الماتىدا ەڭبەك ەتەتىن قىتاي ازاماتتارىنىڭ جاعدايىن تەكسەرۋ بويىنشا بولەك جۇمىستار جۇرگىزىلىپ جاتىر. بارلىق كاسىپورىندا، سونىڭ ىشىندە جاتاقحانالاردا، قوناقۇيلەردە، مەيرامحانالاردا، ءدامحانالاردا رەيد جۇرگىزىلۋدە. جالپى، الماتى قالاسىنداعى جاعداي تۇراقتى.
مەگاپوليستە كوروناۆيرۋس جۇقتىرۋ فاكتىسى تىركەلگەن جوق. ۆيرۋستىق اۋرۋلاردىڭ الدىن-الۋ ءۇشىن ايزات مولداعاسىموۆانىڭ ايتۋىنشا، جەكە گيگيەنانىڭ قاراپايىم ەرەجەلەرىن ساقتاۋ كەرەك: قولدى جۋىپ، حالىق كوپ جينالاتىن ورىندارعا كوپ بارماۋ، مەديتسينالىق ماسكا كيۋ، بەلگىلەرى انىقتالعان جاعدايدا دارىگەرمەن كەڭەسۋ جانە يممۋنيتەتتى كوتەرۋ. قاجەتتى اقپاراتتى الۋ ءۇشىن 1406 Call-ورتالىعىنا تاۋلىك بويى حابارلاسۋعا بولادى.
