بۇل جولداۋدى ىسكە اسىرۋ ءۇشىن كونستيتۋتسياعا 30 دان استام وزگەرىس ەنگىزۋ قاجەت - پرەزيدەنت
بۇر تۋرالى مەملەكەت باسشىسىنىڭ ءوزى ايتتى، دەپ حابارلايدى قازاقپارات ءتىلشىسى.
«مەنىڭ بۇگىنگى باستامالارىم وتە اۋقىمدى. بۇل باستامالار ەلىمىزدىڭ ساياسي جۇيەسى مەن اكىمشىلىك- اۋماقتىق قۇرىلىمىن ەداۋىر وزگەرتەدى. ونى جۇزەگە اسىرۋ ءۇشىن كونستيتۋتسياعا 30 دان استام وزگەرىس ەنگىزۋ قاجەت. سونداي-اق، جىلدىڭ سوڭىنا دەيىن تاعى 20 دان استام زاڭ قابىلداۋ كەرەك»، - دەدى ول جولداۋدى جاريالاۋ بارىسىندا.
ايتۋىنشا، زاڭ جوباسىن ازىرلەپ، ونى قابىلداۋ ەداۋىر ۋاقىتتى الاتىن كۇردەلى جۇمىس. سوندىقتان وعان اسا جاۋاپكەرشىلىكپەن قاراعان ءجون.
«سونداي-اق، ىشكى، سىرتقى سىن-قاتەرلەردى مۇقيات ەسكەرۋىمىز كەرەك. ءبىز تاۋەلسىزدىك جىلدارىندا نەبىر قيىندىقتاردان امان وتتىك. سىن-قاتەردىڭ ءبارىن ەڭسەرىپ، وسى كۇنگە جەتتىك. ەندى ەلىمىزدى تۇبەگەيلى جاڭعىرتۋعا كىرىستىك. بۇل كەزەڭ الماعايىپ ۋاقىتقا تۇسپا تۇس كەلىپ وتىر. قازىرگى قازاقستانعا دا اسەر ەتەتىنى انىق. ءبىراق زامان قانشا كۇردەلى بولسا دا، ءبىز باعدارامىزدان اينىمايمىز. وتكەننەن تاعلىم الىپ، كەلەشەككە سەنىممەن قادام باسامىز»، - دەدى قاسىم-جومارت توقايەۆ.
