تاۋەلسىزدىككە 30 جىل: استانادا زيالى قاۋىم وكىلدەرىمەن كەزدەسۋ ءوتتى
جۇزدەسۋدىڭ بارىسىندا تاۋەلسىزدىكتىڭ 30 جىلدىعى، كورنەكتى تۇلعالاردىڭ ايتۋلى مەرەيتويلارى، باس شاھاردىڭ رۋحانياتى مەن مادەنيەتىن دامىتۋداعى وزەكتى ماسەلەلەر تالقىلاندى، دەپ حابارلايدى قازاقپارات.
ب. ماكەن نۇر-سۇلتان قالاسى - تاۋەلسىزدىكتىڭ 30 جىلدىعىندا تەك ساياسي-الەۋمەتتىك، قارجىلىق-ەكونوميكالىق مىنبەرلەردىڭ ەمەس، مادەنيەت پەن ادەبيەتتىڭ، ونەر مەن رۋحانياتتىڭ دا مارتەبەلى تۇعىرىنا اينالعانىن اتاپ ءوتتى.
«قوعامدى رۋحاني جاڭعىرتىپ، كەمەلدەندىرۋدە مادەنيەت پەن ادەبيەتتىڭ، ونەر مەن رۋحانياتتىڭ ىقپالى زور ەكەنى انىق. پرەزيدەنتىمىز قاسىم-جومارت توقايەۆ ءوزىنىڭ «تاۋەلسىزدىك بارىنەن قىمبات» اتتى ماقالاسىندا وتكەن وتىز جىلدىڭ ءار ون جىلىندا اتقارىلعان ىستەرگە جەكە-جەكە توقتالىپ، «الداعى ءتورتىنشى ونجىلدىقتىڭ بىزگە جۇكتەيتىن مىندەتى - قۋاتتى ەلدىڭ يەسى جانە كەمەل حالىق بولۋ. بۇل جولدا ساياسي-ەكونوميكالىق رەفورمالاردى جانە سانانى جاڭعىرتۋ ۇدەرىسىن جالعاستىرىپ، زامان تالابىنا بەيىمدەلگەن ۇلتتىڭ جاڭا بولمىسىن قالىپتاستىرۋىمىز قاجەت» دەگەن بولاتىن.
مەملەكەت باسشىسى ءوز ماقالاسىندا قازاق ءتىلىن دامىتۋ، ۇلتتىق قۇندىلىقتارىمىزدى تۇلەتۋ، كينو ونەرىن وركەندەتۋ، ساياسي رەفورمالار، ءبىلىم مەن عىلىم سالاسىن دامىتۋ، ادام كاپيتالىنىڭ ساپاسىن ارتتىرۋ سياقتى اسا ماڭىزدى ماسەلەلەرگە توقتالدى. بۇل ەلباسىمىز نۇرسۇلتان ءابىش ۇلىنىڭ باستاماسىمەن دۇنيەگە كەلگەن «مادەني مۇرا»، «رۋحاني جاڭعىرۋ» باعدارلامالارىنىڭ جالعاسى دەپ باعالاۋعا بولادى»، - دەدى باقتيار ماكەن.
كەيىنگى جىلدارى ەلوردادا مادەنيەت سالاسىندا ءبىراز جۇمىستار اتقارىلدى.
اتاپ ايتقاندا، قالامىزدىڭ ءبىرقاتار مەكتەپتەرى مەن كوشەلەرىنە ۇلى تۇلعالاردىڭ ەسىمدەرى بەرىلدى. مۇنداي يگى جۇمىستار الداعى ۋاقىتتا دا جالعاسا بەرمەك. «بىلتىر قاليبەك قۋانىشبايەۆ تەاترى جاڭا ءزاۋلىم عيماراتقا كوشتى. ونىڭ ورنىندا جاس وسپىرىمدەرگە ارنالعان جاڭا تەاتر پايدا بولدى. جاقىندا عانا Nomad تەاترىنا حالىق كاھارمانى ءازىربايجان مامبەتوۆتىڭ ەسىمى بەرىلدى. بيىل جىر الىبى جامبىل بابامىزدىڭ 175 جىلدىعى. سوعان وراي قاليبەك قۋانىشبايەۆ تەاترىندا كورنەكتى تۇلعانىڭ مەرەيتويىنىڭ اشىلۋ سالتاناتى وتەدى. سونىمەن بىرگە بۇگىن اقيىق اقىن مۇقاعالي ماقاتايەۆتىڭ تۋعانىنا توقسان جىل تولىپ وتىر. وسى جىلى ايگىلى بالۋان قاجىمۇقان اتامىزدىڭ 150 جىلدىعى، زاڭگەر سالىق زيمانوۆتىڭ 100 جىلدىعى جانە وزگە مەرەيتويلار بار. ولاردى دا ءتيىستى دەڭگەيدە اتاپ وتەمىز دەپ جوسپارلاپ وتىرمىز»، - دەدى اكىم ورىنباسارى.
ودان كەيىن بەلگىلى اقىن، مەملەكەتتىك سىيلىقتىڭ لاۋرەاتى نەسىپبەك ايت ۇلى، تاريحشى بۇركىت اياعان، فيلولوگيا عىلىمدارىنىڭ دوكتورى سەرىك نەگيموۆ، اقىن سەرىكزات دۇيسەنعازين، قازاقستان جازۋشىلار وداعى نۇر-سۇلتان قالالىق فيليالىنىڭ ديرەكتورى، اقىن داۋلەتكەرەي كاپ ۇلى، ءداستۇرلى ءانشى ەرلان رىسقالي سەكىلدى ءبىرقاتار ازامات ءسوز الىپ، قالانىڭ رۋحاني-مادەني ءومىرىن كوركەيتۋگە قاتىستى وي-پىكىرىن ايتتى.
استانا رۋحانياتىنىڭ دامۋىنا ۇلەس قوسقان، قازىر ومىردە جوق، ەلىمىزگە تانىمال كەيبىر ازاماتتاردىڭ ەسىمىنە كوشە، مەكتەپ بەرۋ تۋرالى ءسوز قوزعالدى. قالالىق ىشكى ساياسات باسقارماسىنىڭ باسشىسى داۋرەن بابامۇراتوۆ ءوز سالاسىندا اتقارىلعان جۇمىستارعا توقتالدى. جيىندى قورىتقان باقتيار ماكەن ايتىلعان ۇسىنىستىڭ ءبارى ەسكەرىلەتىنىن ايتا كەلىپ، باسقوسۋدىڭ سوڭىندا مۇقاعالي ماقاتايەۆتىڭ تۋعان كۇنىنە وراي اقيىق اقىننىڭ ءبىر ولەڭىن وقىپ بەردى.