سولتۇستىكتەگى 300 اۋىل جاڭارادى
ورتالىق كوممۋنيكاتسيالار قىزمەتىندە وتكەن باسپا ءسوز كونفەرەنتسياسىندا سولتۇستىك قازاقستان وبلىسىنىڭ اكىمى قۇمار اقساقالوۆ الداعى بەس جىلدا ءوڭىر اۋىلدارىن دامىتۋعا قوماقتى قاراجات بولىنەتىنىن جەتكىزدى.
«وتكەن جىلمەن سالىستىرعاندا وبلىس قازىناسى %25 عا، ياعني 323 ميلليارد تەڭگەدەن 406 ميلليارد تەڭگەگە دەيىن ءوستى. جالپى 5 جىل ىشىندە ءبىزدىڭ ءوڭىر 500 ميلليارد تەڭگە كولەمىندە ەلەۋلى مولشەردە قولداۋعا يە بولادى. ول اقشا ءتۇرلى سالالارعا جۇمسالادى. ءبىراق ماقسات جالعىز - سولتۇستىك قازاقستاندىقتاردىڭ ءومىر ءسۇرۋ ساپاسىن ارتتىرۋ. بۇل اسىرەسە اۋىل تۇرعىندارىنىڭ تۇرمىس ساپاسىنا قاتىستى. ءوڭىردىڭ 300 اۋىلىن جاڭارتۋعا ۇلكەن قاراجات جۇمساماقپىز»، - دەدى ءوڭىر باسشىسى.
قۇمار اقساقالوۆتىڭ ايتۋىنشا، بيىلدىڭ وزىندە 100 دەن استام اۋىلدا مەديتسينالىق نىساندار مەن جولدار، ينجەنەرلىك ينفراقۇرىلىم جوندەۋدەن وتپەك.
«بيىل 115 اۋىلدى جاڭعىرتۋعا 17 ميلليارد تەڭگەگە جۋىق قاراجات ءبولىندى. اۋىلداردا مەكتەپتەر، بالاباقشالار، دارىگەرلىك امبۋلاتوريالار، كەنتىشىلىك جولدار مەن سۋمەن جابدىقتاۋ جەلىلەرى كۇردەلى جوندەۋدەن وتەدى»، - دەدى اكىم.
