ءبىرىڭعاي تەرەزە قاعيداتى بويىنشا 2 مىڭعا جۋىق ادام «قانداس» مارتەبەسىن الدى

استانا. قازاقپارات – ق ر سىرتقى ىستەر مينيسترلىگىنىڭ شەت ەلدەردەگى مەكەمەلەرى ارقىلى «قانداس» مارتەبەسىن الۋدىڭ جاڭا تەتىگىن ىسكە اسىرۋ جونىندەگى پيلوتتىق جوبا شەڭبەرىندە «ءبىرىڭعاي تەرەزە» قاعيداتى بويىنشا 656 وتباسىنداعى 1997 ەتنيكالىق قازاقتان ءوتىنىش قابىلداندى.

بۇل تۋرالى قازاقپارات ق ر ەڭبەك جانە حالىقتى الەۋمەتتىك قورعاۋ مينيسترلىگىنىڭ باسپا ءسوز قىزمەتىنە سىلتەمە جاساپ حابارلايدى.

باسپا ءسوز قىزمەتىنىڭ مالىمەتتەرىنە قاراعاندا، ەتنيكالىق قازاقتاردىڭ بۇل وتىنىشتەرى قازاقستاننىڭ سولتۇستىك وڭىرلەرىنە جولداندى.

وتىنىشدەردى قابىلداپ العان جەرگىلىكتى اتقارۋشى ورگاندار ولاردى قاراستىرۋى جانە تۇراقتى قونىستانۋ ورنى، جۇمىسقا ورنالاسۋ جانە وڭىرلىك كۆوتاعا ەنگىزۋ بويىنشا ۇسىنىستارىن بەرۋى ءتيىس.

ەتنيكالىق قازاقتاردى قابىلداۋ تەتىگىن قايتا قاراۋ ق ر 2023-2027 -جىلدارعا ارنالعان كوشى- قون ساياساتى تۇجىرىمداماسىن ىسكە اسىرۋ شەڭبەرىندە جۇرگىزىلدى.

وزگەرىستەردىڭ قازاقستان ەلشىلىكتەرى ارقىلى قۇجاتتاردى قابىلداۋدىڭ جاڭا فورماتىنا عانا ەمەس، قانداستاردى قونىستاندىرۋدىڭ مىنا مەحانيزمدەرىنە دە قاتىسى بار، اتاپ ايتقاندا:

- ق ر ۇكىمەتى ايقىنداعان وڭىرلەرگە قونىستاندىرۋ؛

- دەموگرافيالىق دامۋعا قاجەتتىلىگى بار دامۋ الەۋەتى بار اگلومەراتسيالار مەن اۋىلدىق ەلدى مەكەندەردىڭ، شاعىن جانە مونوقالالاردىڭ، اۋداندىق جانە وبلىستىق ماڭىزى بار قالالاردىڭ اۋماقتارىندا قونىستاندىرۋ؛

- قازاقستان اۋماعىندا جانە ق ر ازاماتتارى بولىپ تابىلاتىن وتباسى مۇشەلەرى نەمەسە جاقىن تۋىستارى تۇراقتى تۇرعان جاعدايدا (تۇرعىن ءۇي ماسەلەلەرىن ءوز بەتىنشە شەشۋ مۇمكىندىگىمەن) وتباسىمەن قاۋىشۋ؛

- بوس جۇمىس ورنىنا ورنالاسۋ ماقساتىندا (تۇرعىن ءۇي ماسەلەلەرىن ءوز بەتىنشە شەشۋ مۇمكىندىگىمەن) جۇمىس بەرۋشىلەردىڭ شاقىرۋى.