قازاقستاننىڭ ۋكرايناداعى ەلشىلىگىنىڭ 2 وكىلى كيەۆكە قايتاتىن بولدى

نۇر- سۇلتان. قازاقپارات - ق ر سىرتقى ىستەر مينيسترلىگىنىڭ رەسمي وكىلى ايبەك سمادياروۆ قازاقستاننىڭ ۋكرايناداعى ەلشىلىگىنىڭ جۇمىسىنداعى وزگەرىستەر تۋرالى مالىمەت بەردى، دەپ حابارلايدى قازاقپارات ءتىلشىسى.
None

«ۇستىمىزدەگى جىلعى ناۋرىزدا قازاقستاننىڭ ۋكرايناداعى ەلشىلىگى لۆوۆ قالاسىنا ۋاقىتشا كوشىرىلگەنى بەلگىلى. سونىمەن قاتار پولشا مەن مولدوۆاداعى ەلشىلىكتەرىمىزگە ۋاقىتشا ءوز قىزمەتىن اتقارۋ ءۇشىن ەكى قىزمەتكەردەن جىبەرىلدى. ەلشى دارحان كالەتايەۆ جاقىندا كەڭەس وتكىزۋ ءۇشىن قازاقستاندا بولدى. ونىڭ قورىتىندىسى بويىنشا قازىرگى كەزەڭدە ەكى قىزمەتكەردى - اسكەري اتتاشە مەن كەزەكشى كومەندانتتى تۇراقتى ورنالاستىرۋ ءۇشىن كيەۆ قالاسىنا قايتارۋ تۋرالى شەشىم قابىلداندى»، - دەيدى ايبەك سمادياروۆ.

ۆەدومستۆونىڭ رەسمي وكىلى ەلشىلىكتىڭ باسقا قىزمەتكەرلەرى ازىرگە لۆوۆ پەن كيەۆ اراسىندا قاتىناي ءجۇرىپ قىزمەت ىستەيتىنىن اتاپ ءوتتى.

«ەلشى جانە باسقا قىزمەتكەرلەر لۆوۆ پەن كيەۆ اراسىندا قاتىناپ جۇرەدى. ويتكەنى ءبىزدىڭ كيەۆتەگى ەلشىلىگىمىزدىڭ عيماراتى قاجەتتى جۇمىس پەن كونسۋلدىق قىزمەت كورسەتۋگە بەيىمدەلگەن. سونىمەن قاتار قۇجات اينالىمى ءۇشىن بارلىق قاجەتتى تەحنيكالىق كوممۋنيكاتسيالارى بار. قازىرگى تاڭدا ەلشىلىكتىڭ لۆوۆ قالاسىندا ورنالاسۋى ازاماتتارىمىز بەن قانداستارىمىزدى ەۆاكۋاتسيالاۋدىڭ جالعاسىپ جاتقان پروتسەسى، سونىڭ ىشىندە ولاردىڭ قاۋىپسىزدىگىن قامتاماسىز ەتۋ ماسەلەسىمەن تۇسىندىرىلەدى»، - دەدى س ءى م وكىلى.

ونىڭ مالىمەتى بويىنشا، ق ر ەلشىلىگىن كيەۆكە تولىق قايتارۋ تۋرالى تۇپكىلىكتى شەشىمدى ەلشىنىڭ ۇسىنىسى بويىنشا ق ر سىرتقى ىستەر ءمينيسترى قابىلدايدى.

ەسكە سالايىق، ق ر س ءى م قازاقستان ەلشىلىگى وكىلدەرىنىڭ كيەۆكە قايتقانى تۋرالى اقپاراتقا تۇسىنىكتەمە بەرگەن بولاتىن.

اۆتور: ەسىمجان ناقتىباي

سوڭعى جاڭالىقتار