كەلەر جىلى قازاقستان مەن يران اراسىنداعى تاۋار اينالىم 2 ميلليارد دوللارعا جەتەدى - ەلباسى

 بۇل تۋرالى بۇگىن استانادا يران يسلام رەسپۋبليكاسىنىڭ پرەزيدەنتى حاسان رۋحانيدىڭ قاتىسۋىمەن وتكەن قازاقستان- يران بيزنەس- فورۋمىندا ەلباسى نۇرسۇلتان نازاربايەۆ ءمالىم ەتتى.

«يرانمەن ءوزارا تاۋار اينالىمى سوڭعى كەزدە الەمدىك ەكونوميكاداعى احۋالعا بايلانىستى تومەندەگەن بولاتىن. الايدا، بيىلعى ءبىرىنشى جارتىجىلدىقتا تاۋار اينالامىنىڭ ءوسىپ كەلە جاتقاندىعىن بايقاتىپ وتىر. وسى ورايدا بيىل ونىڭ كولەمى 1 ميلليارد دوللاردان اسادى دەپ ەسەپتەپ وتىرمىز» ، - دەدى ەلباسى.

پرەزيدەنت قازاقستان مەن يراننىڭ گەوگرافيالىق جاقىندىعى، ورتاق تەڭىزدىك شەكارالار، ەجەلدەن جالعاسىپ كەلە جاتقان مادەني- گۋمانيتارلىق جانە تاريحي بايلانىستار، سونداي- اق جوعارى ەكونوميكالىق الەۋەت ەكى ەلدىڭ يگىلىگى ءۇشىن ەكىجاقتى ىنتىماقتاستىققا باعىتتالۋى ءتيىس ەكەندىگىن اتاپ ءوتتى.

وسى ورايدا مەملەكەت باسشىسى بۇگىنگى فورۋم ەكى ەل اراسىنداعى ساۋدا- ەكونوميكالىق قاتىناستاردى جاڭا ساپالى دەڭگەيگە شىعاراتىندىعىنا ءۇمىت ارتتى.

«بۇگىن ءبىز ەكونوميكانىڭ، ساياساتتىڭ جانە وڭىرلىك قاۋىپسىزدىكتىڭ بارلىق سالالارىنا قاتىستى پروبلەمالاردى كوتەردىك. سونىمەن قاتار ەكونوميكالىق ىنتىماقتاستىقتىڭ باسىمدىقتى باعىتتارى بويىنشا ماقساتتاردى ايقىندادىق. بۇل تۇرعىدا ترانزيتتىك- ەكونوميكالىق، ينۆەستيتسيالىق، ونەركاسىپتىك، وندىرىستىك، ساۋدا جانە باسقا سالالارداعى بايلانىستار تالقىلاندى» ، - دەدى پرەزيدەنت.

بيىل قازاقستاننان پارسى شىعاناعىنا دەيىنگى تەمىر جول قۇرىلىسى اياقتالۋعا جاقىنداعانىنا توقتالعان مەملەكەت باسشىسى، وسىعان بايلانىستى الداعى جىلى ەكى ەل اراسىنداعى تاۋار اينالىمى 2 ميلليارد دوللارعا دەيىن جەتۋى مۇمكىن ەكەنىن اتاپ ءوتتى.

ايتا كەتەيىك، وتكەن جىلى قازاقستان مەن يران اراسىنداعى ءوزارا تاۋار اينالىمى 620 ميلليون دوللاردى قۇرادى.

اۆتور: رۋسلان عابباسوۆ