الماتى وبلىسىندا بيىل 280 ميلليارد تەڭگەگە 48 جاڭا جوبا جۇزەگە اسادى - ن. نازاربايەۆ
مەملەكەت باسشىسىنىڭ الماتى وبلىسىنا جۇمىس ساپارى اياسىندا وتكەن ءىس- شاراعا قاراساي اۋدانىنىڭ 5 مىڭنان اسا تۇرعىنى قاتىستى.
جينالعاندارعا ءسوز ارناعان نۇرسۇلتان نازاربايەۆ بۇگىندە ەل ازاماتتارى ءۇشىن بۇكىل الەمگە ەسىك اشىق ەكەنىن، ءبىراق قازاقستان بارشانىڭ قايتا ورالۋعا تىرىساتىن ورنى بولىپ قالىپ وتىرعانىن اتاپ ءوتتى.
- قازاقستاندىقتاردىڭ ەڭبەگىنىڭ ارقاسىندا ءبىزدىڭ رەسپۋبليكامىز تاريحي تۇرعىدان قىسقا مەرزىم ىشىندە عالامات تابىستارعا جەتتى، تاۋەلسىزدىگىن نىعايتىپ، تانىمال ءارى بەدەلدى ەلگە اينالدى. بۇگىندە ءبىزدىڭ ىنتىماعىمىزدان وزگە مەملەكەتتەر ۇيرەنىپ جاتىر. مەن ءۇشىن بۇكىل قازاقستان التىن بەسىك سانالادى، بارشامىزعا دا سولاي بولۋعا ءتيىس. ادام ءوزىنىڭ بالالىق شاعى وتكەن جەردى ەشقاشان ۇمىتپايدى، ءۇشقوڭىر - مەن ءۇشىن وسىنداي جەر. جەتىسۋدىڭ ساف اۋاسى مەن سالقىن سامالىن تابۋ مۇمكىن ەمەس. عاجايىپ تابيعات، سۇيىكتى تاۋلارىمىز جىلدار وتسە دە، بۇرىنعىداي كەرەمەت، - دەدى مەملەكەت باسشىسى.
قازاقستان پرەزيدەنتى عىلىم مەن ونەردەگى جانە باسقا سالالارداعى كوپتەگەن كورنەكتى تۇلعالاردىڭ اۋىلدان شىققانىنا نازار اۋداردى.
- اۋىل - حالىق رۋحانياتىنىڭ دىڭگەگى، مادەنيەتىنىڭ مايەگى، ەلدىگىنىڭ باستاۋى، ءداستۇرىنىڭ قاينار كوزى. قاراساي جەرى ەجەلدەن كوپەتنيكالىق مادەنيەتىمەن بەلگىلى، مۇندا ءتۇرلى حالىقتار مەن ەتنوستاردىڭ وكىلدەرى ءومىر ءسۇردى. ولار بىزگە اكەلەرىمىز ارقىلى بەرىلگەن بىرلىكتىڭ، تاتۋلىق پەن كەلىسىمنىڭ رۋحىن ساقتادى، - دەدى نۇرسۇلتان نازاربايەۆ.
ەلباسى مەملەكەتتىڭ وڭىرلەردى دامىتۋ جونىندەگى جۇيەلى ساياساتى ناتيجەسىن بۇكىل ەلدەن كورۋگە بولاتىنىن ايتتى، دەپ حابارلادى اقوردانىڭ باسپا ءسوز قىزمەتىنەن.
- مەن بۇل ولكەنىڭ قالاي گۇلدەنىپ كەلە جاتقانىن ۇدايى نازارىمدا ۇستايمىن جانە شىنايى قۋانامىن. بىلتىر الماتى وبلىسىندا 20 مىڭ جۇمىس ورنى اشىلدى. يندۋستريالاندىرۋ باعدارلاماسى بويىنشا وڭىردە قۇنى 283 ميلليارد تەڭگە 48 جوبا جۇزەگە اسىرىلدى. سوڭعى ەكى جىلدا جولداردى قالپىنا كەلتىرۋگە ءبىر ميلليارد تەڭگەدەن ءبولىندى. «ورتالىق - وڭتۇستىك» جانە «باتىس ەۋروپا - باتىس قىتاي» ماگيسترالدەرىنىڭ وسى وڭىردەگى ۋچاسكەلەرىنىڭ قۇرىلىسىنا 50 مىڭنان استام ادام قاتىساتىن بولادى. بىلتىر وبلىستا 27 دەنساۋلىق ساقتاۋ نىسانى سالىندى، - دەدى قازاقستان پرەزيدەنتى.
نۇرسۇلتان نازاربايەۆ الماتى وبلىسىنىڭ الەۋمەتتىك احۋالى جاقسارعانىن اتاپ ءوتتى.
- بىلتىر وڭىردە 720 مىڭ شارشى مەتر باسپانا سالىندى. سونىڭ جارتىسىنا جۋىعى - قاراساي اۋدانىندا. قاسكەلەڭ قالاسىنداعى «اسىل ارمان» تۇرعىن ءۇي كەشەنىندە عانا ءۇش مىڭعا جۋىق وتباسى قونىس تويىن تويلادى، - دەدى قازاقستان پرەزيدەنتى.
نۇرسۇلتان نازاربايەۆ ءبىر كەزدەرى اراسى شالعاي بولعان الماتى مەن قاسكەلەڭ بۇگىندە قوسىلىپ كەتكەنىنە نازار اۋداردى.
- الماتى سياقتى اسا ءىرى قالانىڭ جاقىن ورنالاسۋى اۋداننىڭ دامۋىنا وڭ ىقپال ەتەدى. قاراساي اۋدانىندا بۇكىل وبلىس ونىمدەرىنىڭ ۇشتەن ءبىرى وندىرىلەدى، مۇندا 20 شاقتى ءىرى كاسىپورىن جۇمىس ىستەيدى. وتكەن جىلى اۋداندا دارىگەرلىك امبۋلاتوريا، 4 مەكتەپ جانە ءبىر بالاباقشا پايدالانۋعا بەرىلدى، - دەدى مەملەكەت باسشىسى.
قازاقستان پرەزيدەنتى جاستارعا جاعداي جاساۋ ماسەلەسىن دە اتاپ ءوتتى.
- «ديپلوممەن - اۋىلعا!» جوباسى بويىنشا الماتى وبلىسىنا عانا 4 مىڭ مامان باردى. بۇكىل قازاقستان بويىنشا جاستار «ەڭبەكپەن قامتۋ - 2020» باعدارلاماسىنا سايكەس جۇمىسقا ورنالاستىرىلۋدا، - دەدى نۇرسۇلتان نازاربايەۆ.
مەملەكەت باسشىسى اۋىلعا دەگەن قامقورلىق وتكەننىڭ تابىسىنا سۇيەنەتىن ەلدىڭ بولاشاعىنا دەگەن قامقورلىقتى بىلدىرەتىنىن ايتتى.
- بيىل مەملەكەتتىك دەڭگەيدە اتاپ وتىلەتىن تاريحي داتالارمەن بىرگە ءسۇيىنباي اقىننىڭ دا 200 -جىلدىعى تاياپ كەلەدى. كەلەر جىلى جامبىلدىڭ 170 -جىلدىعى بولادى. بۇلار - وسى ولكەدە تۋعان ءىرى تۇلعالار. وسكەلەڭ ۇرپاققا ولاردىڭ ءومىرىن ۇلگى ەتۋ ءۇشىن مەرەيتويلارىن اتاپ وتكەن ءجون، - دەدى قازاقستان پرەزيدەنتى.
نۇرسۇلتان نازاربايەۆ جاسامپاز ەڭبەكتى قولداۋعا، ازاماتتاردىڭ باقۋاتتىلىعىن قامتاماسىز ەتۋگە باعىتتالعان كۇش- جىگەرگە نازار اۋداردى.
- ارنايى ەڭبەك ادامى وردەنى تاعايىندالدى. ءبىز ءبارىمىز ءوز ەڭبەگىمىزدى جانە وسى جىلدارى قازاقستانىمىزدى سونشالىقتى بيىككە كوتەرە العانىمىزدى ماقتانىش ەتە الامىز. ەندى جاڭا اسۋلاردى الۋعا ءتيىسپىز. سوندىقتان مەن «نۇرلى جول» باعدارلاماسى مەن حالىقتىق بەس رەفورمانى ۇسىندىم. وسى باعدارلامالار ارقاسىندا ءبىز ۇزدىك جەتىستىكتەرگە جەتەمىز، ال الەمنىڭ ەڭ دامىعان 30 مەملەكەتى قاتارىنا قوسىلۋ نيەتىمىز لايىقتى ماقساتقا اينالادى، - دەدى قازاقستان پرەزيدەنتى.
سوڭىندا مەملەكەت باسشىسى بارشاعا دەنساۋلىق، تابىس جانە باق- بەرەكە تىلەدى.
فورۋم بارىسىندا سونداي- اق الماتى وبلىسى جۇرتشىلىعىنىڭ وكىلدەرى ءسوز سويلەپ، اۋىلدى دامىتۋ ماسەلەلەرىنە كوڭىل ءبولىپ وتىرعانى ءۇشىن مەملەكەت باسشىسىنا العىستارىن ايتتى.
ءىس- شارا كونتسەرتتىك باعدارلاماعا ۇلاستى.
