ءۇش ۇلتتىق جوبا حالىقتىڭ تابىسىن 27 پايىزعا ارتتىرۋعا مۇمكىندىك بەرەدى – ەرعاليەۆ

بۇل تۋرالى ورتالىق كوممۋنيكاتسيالار قىزمەتىندەگى باسپا ءسوز ءماسليحاتىندا ق ر ۇلتتىق ەكونوميكا ءمينيسترى اسەت ەرعاليەۆ ايتتى، دەپ حابارلايدى قازاقپارات ءتىلشىسى.

ءمينيستردىڭ ايتۋىنشا، «قازاقستاندىقتاردىڭ ءال- اۋقاتىن ارتتىرۋعا باعىتتالعان ورنىقتى ەكونوميكالىق ءوسۋ»، «كاسىپكەرلىكتى دامىتۋ»، سونداي- اق «قۋاتتى وڭىرلەر - ەل دامۋىنىڭ درايۆەرى» اتتى ۇلتتىق جوبالار ەلىمىزدە 450 مىڭ تۇراقتى جۇمىس ورنىن اشۋعا مۇمكىندىك بەرەدى.

«ءۇش ۇلتتىق جوبانى ءتيىمدى ىسكە اسىرۋ ورنىقتى ەكونوميكالىق ءوسۋدى 5 پايىزدان تومەن ەمەس دەڭگەيدە قامتاماسىز ەتۋگە، حالىقتىڭ تابىسىن 27 پايىزعا ارتتىرۋعا جانە ەلىمىز بويىنشا 450 مىڭ تۇراقتى جۇمىس ورنىن قۇرۋعا، سونداي- اق دۇنيەجۇزىلىك ەكونوميكالىق فورۋمنىڭ باسەكەگە قابىلەتتىلىك رەيتينگىندە ينفراقۇرىلىم ساپاسى بويىنشا قازاقستاننىڭ ۇستانىمىن 40-ورىنعا دەيىن جاقسارتۋعا مۇمكىندىك بەرەدى»، - دەدى ول.

ونىڭ اتاپ وتۋىنشە، ۇلتتىق جوبالار - بۇل قازاقستاندىقتاردىڭ ءال- اۋقاتىن قامتاماسىز ەتۋگە باعىتتالعان ناقتى، شىنايى، قولجەتىمدى ماقساتتار مەن مىندەتتەردىڭ تىزبەسى.

«ۇلتتىق جوبالار ەلىمىزدىڭ ەنەرگەتيكا، ساۋدا جانە ينتەگراتسيا، يندۋستريا جانە ينفراقۇرىلىمدىق دامۋ، ەكولوگيا، گەولوگيا جانە تابيعي رەسۋرستار، ەڭبەك جانە حالىقتى الەۋمەتتىك قورعاۋ، مادەنيەت جانە سپورت مينيسترلىكتەرىمەن، سونداي- اق باسەكەلەستىكتى قورعاۋ جانە دامىتۋ اگەنتتىگىمەن بىرلەسىپ ىسكە اسىرىلاتىن بولادى»، - دەدى اسەت ەرعاليەۆ.

اۆتور: مارلان جيەمباي