جەمقورلىق فاكتىسىن حابارلاعاندارعا 27 ميلليون تەڭگە سىياقى بەرىلدى
بۇل تۋرالى ق ر مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگى جۇرتشىلىقپەن بايلانىس دەپارتامەنتىنىڭ ديرەكتورى ارمان بەردالين ايتتى، دەپ حابارلايدى قازاقپارات ءتىلشىسى.
«قازاقستاندا سىبايلاس جەمقورلىق فاكتىسى تۋرالى حابارلاعان نەمەسە سىبايلاس جەمقورلىققا قارسى كۇرەستە باسقاشا كومەك كورسەتكەن ازامات قىلمىستىق جاۋاپكەرشىلىكتەن بوساتىلادى. دالەلىن تاپقان جاعدايدا ءبىرجولعى اقشالاي سىياقى تۇرىندە كوتەرمەلەنۋى مۇمكىن»، - دەدى ول.
ونىڭ دەرەگىنشە، وكەن جىلى جەمقورلىققا بەي-جاي قارامايتىن ازاماتتاردىڭ ءوتىنىشى بويىنشا اگەنتتىكتىڭ سىبايلاس جەمقورلىققا قارسى ءىس-قيمىل ۇلتتىق بيۋروسى ءبىرقاتار جەمقورلىق قىلمىستى انىقتادى.
«2018 -جىلى سىبايلاس جەمقورلىق فاكتىلەرى تۋرالى راستالعان حابارلامالارى ءۇشىن 185 تۇلعا 27,3 ميلليون تەڭگەگە كوتەرمەلەندى. ونىڭ ىشىندە ونشا اۋىر ەمەس سىبايلاس جەمقورلىق قىلمىستار بويىنشا 2 ازامات - 192400 تەڭگەگە، اۋىرلىعى ورتاشا بويىنشا 73 تۇلعا - 9,04 ميلليون تەڭگەگە، اۋىر قىلمىستار بويىنشا 106 تۇلعا - 18,1 ميلليون تەڭگەگە كوتەرمەلەنگەن ەدى»، - دەدى ا. بەردالين.
سونداي-اق، ول وسى جىلدىڭ ەكى ايىندا ۇلتتىق بيۋرونىڭ اۋماقتىق دەپارتامەنتتەرىمەن 29 تۇلعا جالپى سوماسى 4,5 ميلليون تەڭگەگە كوتەرمەلەنگەنىن ايتتى. ونىڭ ىشىندە اۋىرلىعى ورتاشا سىبايلاس جەمقورلىق قىلمىستار بويىنشا 9 ازامات 1,1 ميلليون تەڭگە، اۋىر قىلمىستار بويىنشا 20 تۇلعا 3,4 ميلليون تەڭگە سىياقى العان.
