قوستانايدا كەلەسى جىلى 25 مىڭ كولىك شىعارىلماق

قوستاناي. قازاقپارات - الماتى وبلىسىنىڭ اكىمى اماندىق باتالوۆ قوستاناي قالاسىنداعى «سارى ارقا اۆتوپروم» ماشينا زاۋىتىنىڭ جۇمىس بارىسىمەن تانىستى، دەپ حابارلايدى قازاقپارات.

 «الليۋر» كومپانيالارى» توبىنىڭ قۇرامىنا ەنەتىن قوستانايداعى «سارى ارقا اۆتوپروم» ج ش س بازاسىندا زاماناۋي كولىكتەردى قۇراستىرۋ قولعا الىندى. وسىدان ەكى جىل بۇرىن قىتايلىق ChinaMachinerycompany كومپانياسىنىڭ قاتىسۋىمەن JAC اۆتوكولىگى قۇراستىرىلا باستاعان- دى. ەسكە سالساق، بىلتىر كۇزدە جۇمىس ساپارىمەن قوستانايعا كەلگەن ەلباسى نۇرسۇلتان نازاربايەۆ «سارى ارقا اۆتوپروم» زاۋىتىندا بولىپ، كولىك قۇراستىرۋدىڭ جاڭا ادىسىمەن تانىسقان بولاتىن.

قازىردىڭ وزىندە «سارى ارقا اۆتوپروم» ج ش س 11 مىڭعا جۋىق اۆتوكولىك قۇراستىرعان. «سارى ارقا اۆتو پروم» ج ش س ديرەكتورلار كەڭەسىنىڭ ءتوراعاسى اندرەي لاۆرەنتيەۆتىڭ ايتۋىنشا، كەلەسى جىلى وبلىستا 25 مىڭ كولىك شىعارىلادى.

قوستانايلىق ماشينا قۇراستىرۋشىلار قاتتى تۇرمىستىق جانە ونەركاسىپتىك قالدىقتاردى جيناپ، تاسىمالدايتىن كولىك شىعارۋدى قولعا الدى.

ء«بىز قوقىس تاسيتىن كولىكتەرگە تاپسىرىس العان سوڭ وندىرىسكە 3-اي جۇمسايمىز. مىسالى، استانا قالاسى جاقىندا سىناما ءۇشىن بىزدەگى قوقىس تاسيتىن كولىكتەردى الدى. بۇل تەحنيكالار «ەۋرو 5» ەكولوگيالىق تالاپتارىنا ساي كەلەدى. ەكسپورتقا رەسەي مەن تاجىكستانعا كوبىرەك شىعادى»، - دەيدى اندرەي لاۆرەنتيەۆ.

الماتى وبلىسىنىڭ اكىمى اماندىق باتالوۆ تالدىقورعان قالاسىنىڭ اكىمىنە قوقىس تاسيتىن كولىكتەردى ساتىپ الۋعا تاپسىرما بەردى. سونداي- اق، الماتىلىقتار قوستانايدان شىعارىلاتىن قوعامدىق كولىكتەرگە قىزىعۋشىلىق تانىتىپ وتىر.

ماشينا زاۋاتىنداعى كەزدەسۋ بارىسىندا اماندىق باتالوۆقا قوستاناي وبلىسىنىڭ اتىنان «Peugeot 301» اۆتوكولىگى تابىس ەتىلدى. ءوز كەزەگىندە اماندىق باتالوۆ كولىكتىڭ وبلىستىق بالالار ۇيىنە بەرىلەتىنىن ايتتى.

ارحيمەد مۇحامبەتوۆ الماتىلىق مەيماندارعا «توبىل» فۋتبول كلۋبىنىڭ جاڭادان سالىنىپ جاتقان ستاديونىن كورسەتتى. «توبىل- ارەنا» الاڭىنىڭ ءۇستىن مەمبرانا شاتىرى جابادى. ونىڭ تومەنگى بولىگىندە جىلۋ وقشاۋلاعىشى بار.

«ءبىز الاڭ قۇرىلىسىنا سلوۆەنيانىڭ ونىمدەرىن پايدالاندىق. ولاردىڭ ساپاسىنا، سالماعىنا ءمان بەردىك. جابىق الاڭنىڭ بيىكتىگى - 27 مەتر. ۋەفا- نىڭ بارلىق ستاندارتىنا جاۋاپ بەرەدى. بۇل الاڭدا وبلىس دەڭگەيىندەگى كونسەرتتىك باعدارلامالاردى وتكىزەمىز»، - دەدى ارحيمەد مۇحامبەتوۆ.

بۇگىن الماتى جانە قوستاناي وبلىستارى ءوزارا ارىپتەستىك تۋرالى مەموراندۋمعا قول قويدى.

ناتيجەسىندە، الماتى وبلىسى قوستانايدان «بەلارۋس» ماركالى 50 شاقتى تراكتور، «سارى ارقا اۆتوپروم» زاۋىتىنان 35 اۆتوبۋس ساتىپ الماق. اتالعان تەحنيكالار ليزينگ ارقىلى ىسكە اسۋى مۇمكىن.

اۆتور: قاسقىرباي قويشىمانوۆ