گەرمانياعا ەكسپورتتالۋى ءتيىس 20 مىڭ توننا مۇناي ءالى جەتكىزىلگەن جوق

استانا. قازاقپارات - گەرمانياعا اقپاننىڭ ءبىرىنشى جارتىسىندا جەتكىزىلۋى ءتيىس قازاقستاندىق مۇناي بۇگىنگى كۇنى جولعا شىققان جوق.

اتالعان اقپاراتتى «قازترانسويل» ا ق راستاپ وتىر، دەپ حابارلايدى قازاقپارات ءتىلشىسى.

«2023-جىلعى 21- اقپانداعى جاعداي بويىنشا قازاقستاندىق مۇنايدى «درۋجبا» مۇناي قۇبىرى ارقىلى «اداموۆا زاستاۆا» مۇناي تاپسىرۋ بەكەتىنە دەيىن گەرمانياعا جەتكىزۋ جوباسى جۇزەگە اسقان جوق»، - دەپ جاۋاپ بەردى اگەنتتىك جولداعان ساۋالعا «قازترانسويل» ا ق ىشكى كوممۋنيكاتسيا جانە قوعاممەن بايلانىس دەپارتامەنتىنىڭ ديرەكتورى شىڭعىس ءىلياسوۆ.

ەسكە سالساق، ەنەرگەتيكا ءمينيسترى بولات اقشولاقوۆ اقپان ايىنىڭ ءبىرىنشى جارتىسىندا قازاقستان گەرمانياعا مۇناي ەكسپورتىنىڭ العاشقى پارتياسىن جەتكىزەتىنىن ايتقان ەدى.

«مۇناي تاسىمالداۋ تەحنيكالىق تۇرعىدان پروبلەما ەمەس. بۇگىن رەسەي فەدەراتسياسىنىڭ ەنەرگەتيكا مينيسترلىگىندەگى ارىپتەستەرىممەن سويلەستىم. مۇناي جەتكىزۋ تەحنيكالىق قايتا باعىتتاۋ جانە مارشرۋتتارعا بايلانىستى. اقپان ايىندا مۇنايدى جەتكىزۋدى جۇزەگە اسىرامىز. ازىرگە ءبىرىنشى پارتيا - 20 مىڭ توننا»، - دەدى بولات اقشولاقوۆ مينيسترلىكتىڭ كەڭەيتىلگەن القا وتىرىسىنان كەيىن ب ا ق وكىلدەرىنىڭ ساۋالىنا.

ايتا كەتەيىك، بۇعان دەيىن «قازترانسويل» ا ق 2023-جىلدىڭ ءبىرىنشى توقسانىندا گەرمانيا فەدەراتيۆتى رەسپۋبليكاسىنا 300 مىڭ توننا كولەمىندە مۇناي تاسىمالدايتىنى ايتىلدى.

سونداي-اق بولات اقشولاقوۆ گەرمانياعا جىلىنا 6 ميلليون تونناعا دەيىن مۇناي ەكسپورتتاي الاتىنىمىزدى ءمالىم ەتكەن.