ەلباسى قازاقستان حالقىن استانانىڭ 20 جىلدىعىمەن قۇتتىقتادى
بۇدان بۇرىن حابارلانعانداي، مەملەكەت باسشىسى نۇرسۇلتان نازاربايەۆ استانا كۇنىن مەرەكەلەۋ اياسىندا مەملەكەتتىك تۋدى كوتەرۋ سالتاناتتى راسىمىنە قاتىستى.
«جەلبىرەگەن كوك تۋىمىزدىڭ استىندا بۇگىن ءبىزدىڭ ەلوردامىزدىڭ جيىرما جىلدىڭ مەرەيتويىنا ارنالعان بارلىق شارالاردى باستاعالى وتىرمىز. ەلوردامىزدىڭ 20 جىلدىق مەرەكەسىمەن شىن جۇرەگىمنەن بارشالارىڭىزدى قۇتتىقتايمىن. بيىل ءداستۇرلى مەرەكەمىز استانامىزدىڭ جيىرما جىلدىعىنا تۋرا كەلىپ تۇر. 20 جىل دەگەن تاريح ءۇشىن قاس قاعىم ءسات. بارشا الەمدە ەكى عاسىردىڭ توعىسىندا ەن دالادا قالا سالعان جالعىز ەل - ول قازاقستان»، - دەدى نۇرسۇلتان نازاربايەۆ.
وسى ورايدا، پرەزيدەنت جيىرما جىلدىڭ ىشىندە بۇكىل استانامىز قازاقستاندى الەمگە پاش ەتكەنىن، ەلوردادا ءتۇرلى دۇنيەجۇزىلىك ۇيىمداردىڭ جينالىستارى وتكىزىلىپ جاتقانىن ەسكە سالىپ ءوتتى.
«قازاقستان، تاۋەلسىزدىك، استانا - ءۇش ۇعىمى بىردەي. ءبىزدىڭ جالعىز وتانىمىز بار - ول قازاقستان. ءبىزدىڭ ورىندالعان ارمانىمىز - ول تاۋەلسىزدىك. ءبىزدىڭ ەشبىر ەلدىڭ تۋىنا ۇقسامايتىن كوك بايراعىمىز بار. ول بىرىككەن ۇلتتار ۇيىمىنان باستاپ، بارلىق شەتەلدەگى ەلشىلىكتەردە، ۇلكەن شارالاردا جەلبىرەپ تۇر. ءبىز جىلدا ءداستۇر بويىنشا استانادا مەملەكەتتىك تۋدى كوتەرىپ كەلەمىز»، - دەدى پرەزيدەنت.
سونىمەن قاتار، مەملەكەت باسشىسى - قازاقستان رەسپۋبليكاسى قارۋلى كۇشتەرىنىڭ جوعارعى باس قولباسشىسى ەلدىڭ جوعارى اسكەري وقۋ ورىندارىنىڭ 12 تۇلەگىنە وفيتسەرلىك شەن تاپسىردى.
«ءدال وسى مەزگىلدە اسكەري جوعارى وقۋ ورىندارىن بىتىرگەن جاس ۇلاندارعا ەڭ ءبىرىنشى وفيتسەرلىك شەن تاپسىرعالى وتىرمىز. مەنىڭ ويىمشا، وسى وقۋ ورىندارىن ءتامامداعان ۇزدىك جاستارعا وفيتسەرلىك شەندى تاپسىرا وتىرىپ، بارلىق اسكەري جوعارى وقۋ ورىندارىنىڭ جاستارىن شىن جۇرەگىمنەن قۇتتىقتايمىن. بۇل جاس وفيتسەرلەرگە كوپ ءۇمىت ارتامىز. وتانىمىزدىڭ تىنىشتىعى، ەلىمىزدىڭ شەكاراسىنىڭ بەرىكتىگى، ەلىمىزدىڭ تۇتاستىعى قارۋلى كۇشتەردىڭ قولىندا. بارلىقتارىڭىزعا ساتتىلىك پەن مىقتى دەنساۋلىق تىلەيمىن»، - دەدى ەلباسى.
