توقايەۆ: 2030 -جىلعا قاراي ەنەرگيا تاپشىلىعى پروبلەماسىن سەزىنەمىز
«جەكە توقتالعىم كەلەتىن تاعى ءبىر ماسەلە - الەم ونەركاسىپ پەن ەكونوميكانى ەكولوگيالاندىرۋ جاعىنا قاراي جىلجىپ كەلەدى. بۇگىندە بۇل - جاي ءسوز ەمەس، سالىقتار، باجدار، تەحنيكالىق رەتتەۋ شارالارى تۇرىندەگى ناقتى شەشىمدەر. ءبىز دە بۇدان شەت قالا المايمىز. مۇنىڭ بارلىعى بىزگە تىكەلەي، ەكسپورت، ينۆەستيتسيالار جانە تەحنولوگيالار ترانسفەرتى ارقىلى اسەر ەتەدى. بۇل قازاقستاننىڭ تۇراقتى دامۋ ماسەلەسى دەسەك، اسىرا ايتقاندىق ەمەس. سوندىقتان مەن 2060 -جىلعا قاراي كومىرتەگى وندىرىسىنەن بەيتاراپتىققا قول جەتكىزۋ مىندەتىن قويدىم»، - دەدى پرەزيدەنت پارلامەنت پالاتالارىنىڭ بىرلەسكەن وتىرىسىندا.
ونىڭ ايتۋىنا قاراعاندا، بۇل باعىتتا وتە پراگماتيكالىق جۇمىستار جاسالۋى كەرەك.
«حالىق سانى مەن ەكونوميكا ءوسىپ كەلەدى. ال ساپالى ءوسۋ ءۇشىن ەنەرگيا قاجەت. كومىر ءداۋىرى بىرتىندەپ اياقتالىپ كەلە جاتقاندىقتان، جاڭعىرتىلاتىن ەنەرگيادان بولەك سەنىمدى بازالىق گەنەراتسيا كوزدەرى تۋرالى ويلانۋعا تۋرا كەلەدى. 2030 -جىلعا قاراي قازاقستاندا ەلەكتر ەنەرگياسىنىڭ تاپشىلىعى سەزىلەدى. الەمدىك تاجىريبە ەڭ وڭتايلى جولدى ۇسىنىپ وتى، بۇل - بەيبىت اتوم»، - دەدى مەملەكەت باسشىسى. قاسىم- جومارت توقايەۆ ۇكىمەتكە بۇل ءىستى «سامۇرىق- قازىنامەن» بىرلەسىپ زەردەلەۋدى تاپسىردى.
«ماسەلە وڭاي ەمەس، سوندىقتان ونى شەشۋگە بارىنشا ۇستامدى، ەموتسياسىز قاراۋ كەرەك. ءبىر جىل ىشىندە ۇكىمەت پەن «سامۇرىق- قازىنا» قازاقستاندا قاۋىپسىز ءارى ەكولوگيالىق اتوم ەنەرگەتيكاسىن دامىتۋ مۇمكىندىگىن زەردەلەۋگە ءتيىس. بۇل ماسەلەنى ينجەنەرلىك ءىستى دامىتۋ، ەلىمىزدە بىلىكتى اتوم ينجەنەرلەرىنىڭ جاڭا بۋىنىن قالىپتاستىرۋ تۇرعىسىنان دا قاراستىرۋ قاجەت»، - دەپ تۇيىندەدى ءوز ءسوزىن.
اۆتور: ەسىمجان ناقتىباي
