2027-جىلعا قاراي الماتىدا جەڭىل رەلستى كولىك جەلىسى ىسكە قوسىلادى

جاڭا LRT جەڭىل رەلستى ترامۆاي جۇيەسىنىڭ ءبىرىنشى بولىگىن 2027-جىلعا دەيىن سالۋ جوسپارلانىپ وتىر.

ول ب. مومىش ۇلى، تولە ءبي كوشەلەرىمەن جانە رايىمبەك داڭعىلىمەن قالانىڭ شىعىس شەكاراسىنا دەيىنگى اۋماقتى قامتيدى، دەپ حابارلايدى Kazinform.

بۇل تۋرالى 2030-جىلعا دەيىنگى قالانىڭ كولىك قاڭقاسىنىڭ شەبەر-جوسپارىن تانىستىرۋ شاراسى بارىسىندا جوبانى ازىرلەۋگە اتسالىسقان الەكساندر وۆانەسوۆ ايتتى.

«كولىك قاڭقاسى BRT ،LRT جانە مەترو سياقتى جوعارى جىلدامدىقتى قوعامدىق كولىكتەردىڭ دامۋىنا نەگىزدەلگەن. 2030-جىلعا قاراي قالادا ۇزىندىعى شامامەن 300 كيلومەتر بولاتىن 42 كولىك ءدالىزى قۇرىلادى. قالانىڭ قالعان بولىكتەرىنە تۇرعىندارعا 10-15 مينۋت ىشىندە جاقىن ماڭداعى جەدەل كولىك ايالداماسىنا جەتۋگە مۇمكىندىك بەرەتىن تاسىمالداۋ مارشرۋتتارىن ىسكە قوسۋ جوسپارلانعان»، - دەدى الەكساندر وۆانەسوۆ.

سونىمەن قاتار، ول قولدانىستاعى مەترو جەلىسى الماتىنىڭ باتىس شەكاراسىنا دەيىن تارتىلعانىن تىلگە تيەك ەتتى.

الماتى اكىمدىگىنىڭ حابارلاۋىنشا، كولىك قاڭقاسىنىڭ ينفراقۇرىلىمىن قۇرۋعا 5 جىلدان 7 جىلعا دەيىن ۋاقىت قاجەت. بۇل الماتىنىڭ قوعامدىق كولىگىن جۇيەلى ترانسفورماتسيالاۋ ەلەمەنتتەرىنىڭ ءبىرى بولادى. مىسالى، ب ر ت جىلجىمالى قۇرامىنىڭ باعالاۋ پاركى (اۆتوبۋستار، ەلەكتروبۋستار، تروللەيبۋستار) 3,9 مىڭ بىرلىك. جولاۋشىلار ينفراقۇرىلىمىن قولدانىستاعى 1208 ايالدامادان 1245 ايالداماعا دەيىن كەڭەيتۋ كوزدەلىپ وتىر.

ينفراقۇرىلىمدى سالۋمەن قاتار، قالا قوعامدىق كولىكتىڭ ىڭعايلىلىعى مەن قولجەتىمدىلىگىن ارتتىرۋ بويىنشا ۇيىمداستىرۋشىلىق شارالاردى دا ەنگىزەدى.

كەلەسى جىلى جول اقىسىن تولەۋدىڭ كوپ نۇسقاسىن (ءبىرجولعى بيلەتتەر، ابونەمەنتتەر)، سونىڭ ىشىندە ساپار اياسىندا ءبىر باعىتتان ەكىنشى باعىتقا تەگىن اۋىسۋ مۇمكىندىگىن قامتيتىن جاڭا تاريف ازىرلەنىپ، ەنگىزىلەدى.

سونىمەن قاتار، اۆتوبۋس مارشرۋتتارىن وڭتايلاندىرىپ، ولاردىڭ تۇراقتى ءارى ءجيى قوزعالىسىن قامتاماسىز ەتۋ جوسپارلانعان.