ءاليحان سمايىلوۆ 2022 -جىلعى ەل ەكونوميكاسىن قورىتىندىلادى
«2022 -جىلدىڭ قورىتىندىسى بويىنشا ەل ەكونوميكاسى قالىپتى ءوسۋ قارقىنىن ساقتاپ قالدى. بىلتىر ەكونوميكانىڭ ناقتى ءوسىمى 3,1 پايىزدى قۇرادى. ناقتى سەكتور، ونىڭ ىشىندە وڭدەۋ ونەركاسىبى، قۇرىلىس جانە اۋىل شارۋاشىلىعى سالالارىنداعى وڭ كورسەتكىشتەر تۇراقتى ءوسۋدىڭ نەگىزگى فاكتورى بولدى. اتاپ ايتقاندا، وڭدەۋ ونەركاسىبىندەگى ءوندىرىس كولەمى 3,4 پايىزعا ءوستى. ماشينا جاساۋ سالاسى - 9,4، ونىڭ ىشىندە اۆتوموبيل جاساۋ - 19,1، ەلەكتر جابدىقتارىنىڭ ءوندىرىسى - 22,2، سۋسىندار ءوندىرىسى - 11,2، حيميا ونەركاسىبى - 10,2، جەڭىل ونەركاسىپ - 6، ازىق-تۇلىك ءوندىرىسى - 3,9، مۇناي وڭدەۋ 1,9 پايىز ءوسىم كورسەتتى»، - دەدى ۇكىمەت باسشىسى.
ونىڭ دەرەگىنشە، اۋىل شارۋاشىلىعىندا ءوسۋ قارقىنى جوعارى 9 پايىزدان استى. قۇرىلىس سالاسى دا جوعارى ءوسىم كورسەتىپ، 9,4 پايىز دەڭگەيىندە ءوسىم قالىپتاستى.
«2022 -جىلى ەلىمىزدە 15،4 ميلليون شارشى مەتر تۇرعىن ءۇي پايدالانۋعا بەرىلدى. قىزمەت كورسەتۋ سەكتورى 2,5 پايىزعا ءوستى. ساۋدا - 5، كولىك - 4، بايلانىس 8 پايىزعا وسكەن»، - دەدى ول.
پرەمەر-مينيستر ىشكى جانە سىرتقى ينۆەستيتسيالاردى تارتۋ - ەكونوميكالىق ءوسۋدىڭ ماڭىزدى فاكتورى ەكەنىن باسا ايتتى.
«نەگىزگى كاپيتالعا سالىنعان ينۆەستيتسيالار 7,8 پايىز ناقتى ءوسىم كورسەتتى. بۇل رەتتە، ءوندىرىستىڭ شيكىزاتتىق ەمەس سەكتورىنا ينۆەستيتسيا تارتۋ بەلسەندى ءجۇردى. ينۆەستيتسيالاردىڭ ءوسۋ كورسەتكىشتەرى قۇرىلىستا، دەنساۋلىق ساقتاۋ، ءبىلىم بەرۋ، ساۋدا، جىلجىمايتىن مۇلىكپەن وپەراتسيالاردا، اۋىل شارۋاشىلىعى، ونەركاسىپتە، كولىك جانە قويمالاۋ سالالارىندا جوعارى بولدى. بارلىق نەگىزگى ماكروكورسەتكىشتەر بويىنشا اقمولا، الماتى، باتىس قازاقستان، جەتىسۋ، قوستاناي، قىزىلوردا، پاۆلودار، شىعىس قازاقستان وبلىستارى مەن شىمكەنت قالاسىندا ءوسىم بايقالدى. ال، ەڭ تومەن كورسەتكىش ۇلىتاۋ، ماڭعىستاۋ، اتىراۋ جانە اباي وبلىستارىندا تىركەلىپ وتىر»، - دەدى ءاليحان سمايىلوۆ.
