قازاقستاندا 2021 -جىلدى ەكولوگيا جىلى دەپ جاريالاۋ ۇسىنىلدى
«اتىراۋدا بۇگىن ەكولوگيالىق اپوكاليپسيس بولدى دەۋگە نەگىز بار. توقسانىنشى جىلداردان بۇگىنگە دەيىن اۋا باسسەينىنە 4 ميلليون توننا ۋىتتى زاتتار شىعارىلعان ەكەن. وسىنىڭ بارلىعى ءبىزدىڭ دەنساۋلىعىمىزعا زيان كەلتىرىپ وتىر. شاقالاقتاردىڭ شەتىنەۋى جانە دە ءتۇرلى پاتولوگيالار بويىنشا الدا كەلە جاتىرمىز. مەنىڭ ۇسىنىسىم - ءبىزدىڭ ەكولوگيا مينيسترلىگىن قۇرىپ بەرگەن پرەزيدەنتىمىز قاسىم- جومارت توقايەۆ كەلەر 2021 -جىلدى ەكولوگيا جىلى دەپ جاريالاسا ەكەن. جيىرما جىلدا بىردە- ءبىر ەكولوگيا جىلى جاريالانعان جوق. قازاقستاندىقتاردى وسى ۇسىنىسىمدى قولداۋعا شاقىرامىن، - دەدى ارمان حايرۋللين «ەكولوگيالىق ءبىلىم: قازاقستاندىق قوعامدا ەكولوگيالىق ءبىلىم بەرۋ، ەكولوگيالىق مادەنيەتكە تاربيەلەۋ جانە قالىپتاستىرۋ» اتتى دوڭگەلەك ۇستەل وتىرىسىندا.
سپيكەر جەرگىلىكتى دەڭگەيدە اتقارۋشى ورگاندارمەن بىرلەسىپ، كوپتەگەن جوبالاردى جۇزەگە اسىرىپ جاتقانىن جەتكىزدى.
«بۇگىنگى جيىنعا قاتىسۋشىلار، مينيستر حانىم (اقپارات جانە قوعامدىق دامۋ ءمينيسترى ايدا بالايەۆا - رەد.)، ءسىزدىڭ دە تاراپىڭىزدان باسقا دا كوتەرىپ جۇرگەن ماسەلەلەرىمىزدى قولداساڭىز، قويان- قولتىق جۇمىس ىستەۋگە قاتىسساڭىز دەگەن تىلەگىمىز بار. تىكەلەي ينتەراكتيۆتى بايلانىس ورناتايىق. ەكولوگيا مينيسترلىگى دە سەنبىلىكتەردى ۇيىمداستىرۋدان بولەك، كەلەلى ۇلكەن ماسەلەلەرمەن جۇيەلى تۇردە اينالىسۋى كەرەك. ۇلت دەنساۋلىعىنا قاۋىپ توندىرەتىن تاقىرىپتارمەن اينالىسۋ كەرەك، - دەدى قوعام قايراتكەرى.
ايتا كەتەيىك، ق ر اقپارات جانە قوعامدىق دامۋ مينيسترلىگى «ەكولوگيالىق ءبىلىم: قازاقستاندىق قوعامدا ەكولوگيالىق ءبىلىم بەرۋ، ەكولوگيالىق مادەنيەتكە تاربيەلەۋ جانە قالىپتاستىرۋ» تاقىرىبىندا دوڭگەلەك ۇستەل وتكىزىپ جاتىر.
