ەلباسىنا ق ر تۇڭعىش پرەزيدەنتى قورىنىڭ 2020 -جىلعا ارنالعان جۇمىس جوسپارى ۇسىنىلدى
نۇر- سۇلتان. قازاقپارات - نۇرسۇلتان نازاربايەۆ قازاقستان رەسپۋبليكاسى تۇڭعىش پرەزيدەنتى - ەلباسى قورىنىڭ اتقارۋشى ديرەكتورى اسەت يسەكەشيەۆتى قابىلدادى، دەپ حابارلايدى قازاقپارات elbasy.kz سىلتەمە جاساپ.
كەزدەسۋ بارىسىندا اسەت يسەكەشيەۆ قوردىڭ الەۋمەتتىك جانە ءبىلىم بەرۋ سالالارىنداعى جوبالارىنىڭ ىسكە اسىرىلۋى تۋرالى بايانداپ، 2020 -جىلعا ارنالعان جۇمىس جوسپارى تۋرالى مالىمەت ۇسىندى.
- 2019 -جىلى قور 95 جوبانى جۇزەگە اسىردى. ولاردىڭ قاتارىندا ءبىلىم سالاسىنداعى تالانتتى شىعارماشىل جانە عىلىم سالاسىنداعى دارىندى جاستاردى قولداۋ جوبالارى بار. الەۋمەتتىك سالادا ءبىرقاتار جوبالار، سونىڭ ىشىندە قايىرىمدىلىق شارالار جۇزەگە اسىرىلدى. 2019 -جىلى قور جوبالارىنىڭ قامتۋ اياسى ايتارلىقتاي كەڭەيىپ، ءىس- شارالارعا قاتىسۋشىلاردىڭ جالپى سانى 460 مىڭ ادامدى قۇرادى، - دەدى قوردىڭ اتقارۋشى ديرەكتورى.
سونىمەن قاتار، ءا. يسەكەشيەۆ قازاقستان رەسپۋبليكاسى تۇڭعىش پرەزيدەنتى - ەلباسى قورى جانىنداعى الەمدىك ەكونوميكا جانە ساياسات ينستيتۋتىنىڭ قىزمەتى تۋرالى اقپارات بەردى.
- الەمدىك ەكونوميكا جانە ساياسات ينستيتۋتىنىڭ نەگىزىندە گەوساياسات، ەكونوميكا، ادام كاپيتالى، سونداي- اق، الەۋمەتتىك جانە ايماقتىق زەرتتەۋلەر جۇرگىزۋ ءۇشىن ستراتەگيالىق «ويلاۋ ورتالىعى» قۇرىلادى. ءبىز 20-دان استام كونفەرەنسيالار، دوڭگەلەك ۇستەلدەر مەن فورۋمدار وتكىزدىك، - دەدى قوردىڭ اتقارۋشى ديرەكتورى.
سونداي- اق، قازاقستاننىڭ تۇڭعىش پرەزيدەنتىنە قوردىڭ ترانسفورماتسياسى اياسىندا جۇرگىزىلىپ جاتقان جۇمىستار تۋرالى مالىمەت ۇسىنىلدى. كەلەسى جىلى تۇڭعىش پرەزيدەنت قورىنىڭ نەگىزگى باعىتتارى بويىنشا 125 ءىس- شارا وتكىزۋ جوسپارلانعان.
كەزدەسۋ سوڭىندا ەلباسى ءبىرقاتار ناقتى تاپسىرما بەردى.
